La Patrie dal Friûl e je presint ancje su Facebook cuntune sô pagjine, rivade aromai a cuasi 6.000 di lôr che le seguissin. Un imprest par difondi il gjornâl, ma ancje par incuintrâ e dialogâ cui letôrs e cui furlans che a balinin pal social network. E cussì, al capite di cjatâ cualchi realtât interessante…
✽✽✽
5.000 e passe adesions (i “mi piace”) intal moment che o scrivìn e che duncje a saran za aumentâts: “Amici della Carnia fanpage” e je une pagjine Facebook cun tantis fotos e notiziis che a vegnin de nestre mont. Anìn a viodi cui che le à metude sù…
Mandi, Amici della Carnia! Cui aministrial la pagjine e cemût ise nassude la idee?
Jo mi clami Francesco Bellina e mi judin a fâle doi amîs. La idee di creâ la pagjine e je nassude dal gno amôr pe mê tiere e – pensant a trop che e je biele la Cjargne e a tropis tradizions che e conserve e e trasmet di gjenerazion in gjenerazion – mi sarès plasût fâle cognossi a plui int pussibil… E cussì e je nassude Amici della Carnia.
––
Cuâl isal il spirt de pagjine?
Fintremai de sô creazion, la pagjine e je nassude “no politiche” e no “cun finalitâts di vuadagn”, no je stade metude sù par protestâ o par ofindi. La sô uniche smire e je chê di fâ cognossi la Cjargne e di tignî dongje la sô int e ducj i siei amiradôrs.
––
Cemût decidêso e tiraiso dongje i contignûts de pagjine?
La plui part a son fotos dai responsabii de pagjine, ma nus rivin une sdrume di amîs de pagjine che a vuelin condividilis cun nô e fâlis viodi a ducj. Ogni tant o metìn ancje cualchi post sul significât di une peraule o di un mût di dî.
––
Cuâi sono i contignûts che a àn plui sucès?
Cence dubi, a son lis fotos di moments di vite di tancj agns fa: se a son fotos in blanc e neri a plasin une vore. Altris fotos che a plasin tant a son chês dai lavôrs e de vite de mont, o miôr de vite in malghe, par esempli il tai de jerbe a man, cul falcet. In sumis, dut chel che al è sempliç e naturâl (jo o dîs ce che al è gjenuin).
––
Mi contistu di une robe che e à vût sucès e no si spietavis?
Timp fa o vin fat un post sul significât de peraule “Mandi”: tancj di nô di sigûr a san che al significarès “tes mans di Diu” o “Va cun Diu”, e chel post al à vût un sucès pardabon inspietât; tancj i “mi piace” e tantons i coments de int che e à preseât e nus à augurât un Mandi sincîr e di cûr.
––
La partecipazion de int e pant un grant amôr pe Cjargne, che invezit e somee trascurade des istituzions: ce idee ti sêstu fat de situazion? Di ce aie bisugne la mont, in plui che des pagjinis Facebook?
Personalmentri, o stimi che la Cjargne e vedi pierdût chel atrat e chês sinergjiis che si vevin tancj agns indaûr. Chest par vie di istituzions e politichis (locâls e comunitariis) che a àn valorizât dome lis ativitâts produtivis dal setôr secondari e terziari, cence tignî di cont la agriculture e l’arlevament, che al jere il cûr di une realtât di mont che al mantignive vîf il teritori. Un grant jutori al podarès derivâ dal miorament des stradis, dal recupar des placis che in tancj paîs a son bandonadis, dal aument dai servizis indispensabii aes personis, distribuîts ben in ogni paisut. Cun di plui, tante publicitât su lis fiestis, sagris, cussì a la int i ven gole di vignî in Cjargne.
––
O doprais pôc il cjargnel tai vuestris “status”, parcè?
O scrivìn scuasit dut par talian parcè che tante int che nus seguìs no je cjargnele ni furlane, ma par motîfs varis e je passade in Cjargne e si è inamorade di cheste tiere, ma no sa il cjargnel.
––
Secont te Facebook e i social puedino judâ lis piçulis lenghis?
Sì: tai ultins timps lis gnovis gjenerazions a passin cetant timp sui “social” e duncje al è un potent mieç di informazion e di difusion di notiziis e di contignûts. Mi auguri che a vadin indevant a nassi tantis altris pagjinis che a tratin di lenghis, dialets e realtâts locâls di ogni teritori. ❚
Dree Venier
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +