MUSICHE. Il gnûf cd dai Leuq

I Luna e un Quarto a son deventâts “grancj”. La formazion di Muçane, vincidore dal Premi Friûl 2010, e je vignude fûr cuntun gnûf lavôr dal titul “Nel buio, nel vento, nel sole”, regjistrât, mixât e masterizât di Francesco Marzona tal Birdland studio di Gurize, simpri par Musiche Furlane Fuarte. Plui madûr dal disc di esordi “Basse Pression”, al à 7 tocs, dome doi – cheste volte – par furlan. «A son vignûts fûr cussì» a contin «al è il toc stes che al clame la lenghe: taliane o furlane». E se a ven in marilenghe, «la varietât e je chê de Basse Furlane» a precisin «il c dolç al ven pronunciât cul z», marche di fabriche di Muçane, anzit “Muzane” apont.
Folk, blues, gispy, i 7 components (Jacopo Casadio – ghitare eletroche, acustiche e vôs; Tomas Vergendo – vôs; Alessio “Balute” Turco – armoniche; Davide Sciacchitano – liron; Boris Sciacchitano – chitare acustiche, darbuka, shaker; Sergio Galasso – ghitare classiche, banjo, glockenspiel; Cristian “Colete” Toneatto – batarie, cajon) a passin di musichis balcanichis come Muzika aes baladis malinconichis dal “Blues del temporale” al stîl “meditatîf” di Polvere. Une vore presint ancje in chest cd, il teme dal viaç, cu lis Stradis che nus «puartin lontan», intal grant viaç des nestris emozions. O cun Rrock, rangjiament par furlan de cjançon dal cjantautôr Gianmaria Testa, che e conte di migrazions: dome che a fâ i “viaggi della speranza” a son i nestri vons lâts a cirî fortune in Canadà (e ven ripartuade una letare vere di un nestri emigrant). Toc rinfuarçât par intensitât dal piano Wurlitzer di Paolo Paron. Con “La mezzaluna nera” si denunciin miseris cuotidianis in dî di vuê in maniere mancul lizere di “Cjale fîs e no capìs”: cheste volte no je dome une zoventût pierdude denant de television, ma a son “brillanti video poker” e “rughe fonde come un capo indiano”. La riflession no gjave però la ligrie contagjose che e caraterize chest grup. Al baste viodilu une volte dal vîf: la sô energjie le à ben sintude ancje il public di Suns, tal Novembar passât a Moena (Tn), che ur à fat vinci il prin premi. ❚
✒ Natascia Gargano