«Te musiche, come te vite, la uniche robe che e conte ae fin e je la ispirazion e il coraç di lâi daûr, cence preocupâsi des consecuencis. Se un doman al ven fûr che si veve fat alc in maniere sbaliade, almancul si lu varà fat divertintsi». Si presente cussì Priska Benelli, artiste di Piluver. Il so al è un stîl inconfondibil. Il so ultin cd al è “Souvenir de Printemps”, cul titul par francês, che al conte des origjins de artiste. Cheste produzion dal 2015 e à vût recensions une vore bielis e e à puartât a Priska grandis sodisfazions personâls.
Le cjatìn par fâsi contâ dal so gnûf album dal titul “Soli che si appartengono”, che al sarà publicât in curt, li che la artiste e à metût in musiche 12 tescj dal scritôr roman Alessandro Hellmann. «O vevi musicât un test dal scritôr tal 2006, “Niente di niente”, che o torni a proponi in chest gnûf cd intune altre version insiemi a altris che, tacant dal 2013, o soi lade indenant a musicâ».
“Soli che si appartengono” al jessarà in curt, ma su YouTube si pues za scoltâ une prime cjançon, “Santamarea”, e sul sît personâl http://priskamusic.com/ si puedin cjatâ tantis informazions.
Intant Priska e colabore cul amì e bassist Marco Dell’Asin e e continue a produsi cjançons par furlan, francês e talian. L’ultin toc che e à scrit al è propit par furlan e si clame “Anime cence vôs”, cuntun test componût pensant a chei animâi che in cheste vite no àn fortune.
Pal avignî, il sium di Priska al è chel di vê simpri gnovis colaborazions, che le stimolin a cirî gnovis soluzions e gnûfs mûts di svicinâsi ae musiche.
«Gno pari al dîs che Piluver al è il paîs plui biel dal mont – nus conte -. Cualchi volte lu capìs, altris invezit mi domandi cemût che e sarès lade la mê vite se o fossin restâts a Parîs, dulà che o soi nassude. O vuei ben al puest dulà che o soi cressude, mi fâs tenarece dute cheste nature, chestis monts, il Tiliment… ma cualchi volte mi sint ancje isolade dal rest dal mont, massime a nivel di musiche. Chest isolament al pues jessi un dissuasîf par un zovin cjantautôr che al pense di scrivi par furlan. Par fortune che a esistin iniziativis e festivai internazionâi tant che Suns Europe, dulà che o ai partecipât ancje jo, e radios come Onde Furlane, Radio Spazio 103, Rai Radio 1 regjonâl che a promovin la musiche furlane».
E e zonte: «Mi preocupe la puaretât di culture musicâl de plui part de int, la mancjance di curiositât viers ce che nol ven de television. Insegnâ aes gnovis gjenerazions a resonâ cul lôr cjâf e a butâ il voli dilà di ce che al ven servît e a no contentâsi culturalmentri, e je la clâf par un avignî radiôs, ancje pes lenghis minorizadis tant che il furlan». ❚
Moira Pezzetta
