MUSEUS. Glück Auf: sperìn di saltâ fûr

Chê di Raibl (par furlan Rabli) e je une storie che si compagne ad implen cul teritori e lis ricjecis che li si ‘nt cjatin.
Rivant in dì di vuê de strade di Tarvis in chest paisut, a 10 km dal cjâfluc, sot de mont Re, no si rive a imagjinâ ce che e podeve jessi stade cheste localitât fint ai prins agns Novante.
Un paîs di passe 1200 abitants, servizis, negozis, scuelis, teatri e cine, ospedâl: une realtât sflandorose che ben a planc cul passâ dai agns e des necessitâts si è distudade fint a deventâ dome un grop di cjasis cuntun grant passât che vuê si cîr di tignî vîf.
LA STORIE DE MINIERE_ Si pense che za uns 800 agns prin di Crist chescj teritoris a fossin sfrutâts pe estrazion di plomp e zinc in maniere superficiâl. Ma lis primis notiziis siguris lis vin tor il 1320 cuant che l’imperadôr Fedrì il Biel al lassà a un consorzi di minadôrs la concession par gjavâ fûr il zinc e il plomp. Za in chei agns duncje si sa de posizion strategjiche di chê zone viers i paîs dal nord Europe. Di gnûf tal 1456 o savìn di un ciert Osvaldo Rabel (di chi forsi il non dal paîs) che al concedè l’ûs de miniere ai tarvisians. Dilunc de storie si cjatin tantis notiziis relativis al sfrutament de miniere e de impuartance che e vè cheste localitât pe storie economiche e sociâl de zone montane. Tal Votcent la scuvierte de eletricitât e dal so implei industriâl e modernize la situazion de miniere e tal 1898 si scree la prime centrâl idroeletriche pal miorament dai implants. Il paîs di Raibl al è un dai prins a cognossi la iluminazion eletriche tes cjasis.
L’INZEGNÎR NOGARA_ Figure impuartantone pe storie de miniere tai agns Trente, Giovanni Nogara, laureât in inzegnerie mecaniche e minerarie a Milan e a Londre, al puartà il sît a un nivel di produzion simpri plui alt, cu la sostituzion di machinaris aromai vecjos e l’increment de estrazion.
PRIVILEÇS_ Il lavôr dal minadôr al jere dûr, pericolôs, malsan e propit par chest, tai prins decenis dal secul XX, a vignerin concedûts cetancj privileçs ai lavoradôrs e a lis lôr fameis: lis cjasis fitadis a pocjis liris, lis curis termâls a Lignan par 15 dîs ad an, lis paiis tra lis plui altis di Italie.
Dut chest vivôr al durà fint ai agns Otante cuant che a tacarin lis dificoltâts des societâts che a vevin cjapât la miniere; cun proroghis de Regjon si rivà fint al 1991 cuant che l’ultin turni dai lavoradôrs si finì cuntune baricade di 55 di lôr par 17 dîs. Ma dut chest nol bastà a salvâ il lavôr di centenârs di personis e vuê Raibl al è un paisut di 400 animis cuasit dismenteât. ■
Venusia Dominici