MEDITANTLIS TAL SO CÛR. Un regâl misteriôs

Ai undis di Otubar dal 1962 si vierzeve te basiliche di S. Pieri a Rome il Concili Vatican secont, e Pape Benedet XVI, tal aniversari dai cincuante agns, al à indet l’an de fede: un tornâ a la fede; un rifleti, vie par chest an, sore de fede.
Se mi domandais ce che e je la fede, come tecnic dal sacri us fas un discorson; ma, puar mai me, se o cjali a la fede te mê vite, o varès pôc ce contâ.
Al scriveve sant Ustin: “No sta domandâmi ce che al è il timp, e o sai ce che al è; domandimi ce che al è il timp, e no sai ce che al è”. Cussì, de fede clopadice in me.
Ce ise la fede?… O jeri frut; o varai vût siet agns e o durmivi sot il cuviert tune stanziute sofitade; e jere une zornade di Istât; o soi jevât e o soi lât a vierzi in sfrese la puarte de cjamare dai miei gjenitôrs. Mê mari, inzenoglade su la plancje, e jere te intimitât de preiere. Cheste femine e je par me la fede.
Mi domandais: Ce ise la fede? cuant che pre Pauli Varut al jere malât, i miedis dal ospedâl di Udin si maraveavin che tal mieç di tancj dolôrs al fos cussì seren; un miedi, une dì, i domandà a un so coleghe: “Cemût fasial?… jo no crôt a lis pantianis de fede”. Ma l’amì i rispuindè: “Se mi mali, podessio vê dentri di me cheste midisine  potente”.
Ce ise la fede?… A disevin une volte che, cuant che a rivin lis disgraciis, bisugne vierzi puartis e barcons. Jo no mi domandi ce che e je la fede, ma al contrari: “Cemût fasie une persone a vê fede cuant che te vite dut i cole?! Cemût rivie a sperâ te disperazion, a cjatâ seren te timpieste, a viodi une lûs te gnot, a crodi che la vite e à un sens ancje li che no si viôt lum di bonsens? Cemût rivie…?”. No lu sai.
Però o ai cognossût e o cognòs feminis e oms cussì.
O cjati la fede tune preiere di Dietrich Bonhoeffer:
“Signôr ti clami sul cricâ dal dì. Judimi a preâ, a tirâ dongje i miei pinsîrs par presentâju a ti. Dentri di me al è scûr, intal lusôr; o soi bandonât e bessôl, ma tu tu sês cun me; no ai plui fuarce in me e o sint coragjo in te; o soi dut conturbât, e tu mi puartis la pâs; la mê vite e cole di marum e mi ven spirt in te. Jo no capìs lis tôs stradis, ma tu tu cognossis un troi par me”.
La fede e je un poiâsi in Diu; al scriveve M. L. King: “Che al sucedi ce che al à di sucedi: Diu al è potent! Se nus tocje di cjaminâ tal scûr, o pensìn simpri che intal mont e je une grande energjie di amôr che si clame Diu. Diu al pues vierzi puartis ancje li che no ‘nd è. Lui al cambiarà la tribulazion di îr intun doman seren e lusorôs”.
Tun salm si lei: “Come un frut distetât tal braç di sô mari, come un frut distetât e je dentri di me la mê anime”. (Sal 131,2)
Cheste e je la fede. Un regâl misteriôs di invocâ e che dome tu, Signôr, tu pues dâ.
Par chest o fâs mê la antighe preiere: “O crôt Signôr, ma tu jude la mê pocje fede”.■
pre Tonin Cjapielâr