MEDITANTLIS TAL SO CÛR. Sot de plante di ricin

Al faseve cjalt te gleseute de localitât di Monasteri a Aquilee in chel lunis 18 dal mês passât cuant che o vin saludât il professôr Renato Iacumin. La gleseute e jere colme di int; altris personis a partecipavin a la celebrazion liturgjiche restant sot de plombe dal soreli te plaçute; altris si jerin ritirâts te ombrene di cualchi arbul o cjase; là jù, li che e scomence la strade, cualchidun cjacarave, ma pal rest, ducj a jerin cidins intant che a scoltavin la Messe difondude de casse sonore.
Al celebrave un troput di predis e la liturgjie e je stade une vore, ancje masse semplice, seont me. Dapît mi spietavi l’intervent di cualchi sorestant o studiôs, ma nuie di nuie e o soi restât mâl. Al di là di dut chest, al sta il fat che il prof. Iacumin masse a la svelte nus à lassâts. Jo o vevi par lui une vore di rispiet e chês confidencis che a nassin dal vê scoltadis conferencis, dal vê let cualchi so libri e de partecipazion a dibatits e riflessions peadis a la Aule Nord de basiliche e a la Pistis Sophia.
Come grop di Glesie Furlane i vin agrât parcè che simpri al è stât presint cuant che lu vin clamât.
No soi un studiôs e no soi in grât di dâ une valutazion de opare di Iacumin. Mi plâs ripuartâ però il pinsîr dal espert Remo Cacitti che te Prefazion dal Pastore ad Aquileia (ed. Glesie Furlane, 2010) al pon, fra i merits dal professôr, ancje chel di vê cjatade la clâf par podê jentrâ tune leture de organizazion e dai contignûts dai mosaics des aulis de basiliche di Aquilee.
Cumò che Iacumin al è jentrât in chel altri mont mi plâs viodilu fra i mosaics des Aulis Nord e Sud de Basiliche e mi fermi cun lui a cjalâ il cicli di Gjone. Salacor cuant che al jere frut al varà ancje mateât sore chestis figuris; di zovin lis varà olmadis cun voli distrat o curiôs, par dopo scrutinâlis in ogni maniere, deventât om e studiôs.
Cuant che al jere in vite, Iacumin al cjalave chel mosaic dal di fûr; cumò in chel mosaic al è jentrât, come che o jentrarìn ancje nô. Ancje lui di fat come Gjone al è stât glotût dal grant pes e al è plombât in chês inferis che nissun, seont la cjacarade umane, torne indaûr.
Te Messe di funerâl, il celebrant al à dite une robe grande: no jerin i mosaics a nudrî la fede di Iacumin, ma lui, pe fede che al veve, al scrutinave i mosaics.
In cheste sô fede lu compagnìn. Rufin, comentât il Symbolum di Aquilee al scrîf: “Crist al è lât jù tes inferis cu la sô divinitât no par jessi tratignût de muart ma par spalancâ lis puartis dal ream de muart a chei che, gracie a lui, a saressin resurîts. Al è come se un re al les tune preson e jentrât dentri al sfracassàs lis puartis e al menàs fûr in libertât chei che son tes cjadenis e al des vite a chei che si cjatin tal scûr e te ombrene de muart”.
Si lei inte Bibie che “Alore il Signôr Diu al fasè cressi parsore di Gjone une plante di ricin, par che al ves ombrene sul so cjâf e al fos deliberât dal so malstâ.
Gjone si indalegrà unevore par chel ricin” (cf. Gjo 4,6).
Polse, Jacumin, sot dal ricin cun Gjone; polse in chel cicli di Paradîs e de salvece universâl che, seont i studiôs, i mosaics de basiliche nus prometin e nus fasin sperâ. ■
pre Tonin Cjapielâr