APONTAMENTS. Pre Antoni al è tornât in Cjargne

Al jere il 1974 cuant che pre Antoni Beline, plevan di Val e Rualp, al fondave il Comitât Frazionâl di Val e Rualp (frazions di Darte). A distance di passe 35 agns, l’atuâl president Lucio Leschiutta, «Jo il Pari Nestri lu vevi imparât dome par furlan e o ricuardi cun afiet il nestri Siôr Santul», e grazie al impegn di Ireno Sandri, doi “fantats di in chê volte” cressûts cun pre Antoni, al à volût ricuardâlu cuntune presentazion dal DVD “La fabriche dai predis”.
A son intervignûts il sindic di Darte Marlino Peresson che al à puartât i salûts de aministrazion comunâl, rapresentade ancje dal assessôr a la culture Guido Della Schiava, Dree Valcic, pre Roman Michelot e Celestino Vezzi di VideoTeleCarnia che a àn fat un apel al Comun di Darte «Al sarès impuartant di bande dal Comun valorizâ la figure di pre Antoni che in 14 agns (dal 1968, cuant che al rivà sù di Codroip) al veve strent un rapuart particolâr, dant tant a chestis comunitâts che i son restadis tal cûr, ma ancje ricevint une vore di bande de int».
“In Cjargne – al diseve pre Antoni – o ai vude come une seconde nassite culturâl e spirtuâl, parcè che o ai tacât a volêi ben e a spindi la mê vite pal popul e pe glesie furlane”.
E chest afiet si è sintût vie par dute la serade che e à vût une grande e sintude partecipazion de int che inmò e ricuarde la grinte e i insegnaments dal lôr “Siôr Santul”.
INFO: cui che al volès ospitâ une serade di presentazion dal DVD “La fabriche dai predis” al pues scrivi a info@lapatriedalfriul.org. ■
Redazion