In Jugn la scuele si è sierade e cun Lui lis ativitâts culturâls e sociâls a son fermis, lis vacancis a son a pene tacadis. Insegnants, mestris, professôrs, inteletuâi, predis, students a àn dut il timp par pensâ. Ur lassin chest articulut di pre Antoni di lei e meditâ in chest lunc timp di polse e di feriis.
pre Roman Michelotti
A son in tancj a dî che il Friûl al è muart.
O intint naturalmentri il Friûl come civiltât, come identitât, come cussience, come culture furlane che e à il so spieli primarûl inte lenghe. A ducj chescj pissighets, che a volaressin passâ par profetis dal nuie, jo ur consearès di leisi un tocut dal libri di Pinochio, chel tocut là che il Corvac, doprant un sisteme vonde artesanâl, al dîs che “se un nol è muart, al è segno che al è vîf”. Nol è duncje il câs di dâ par spedît un popul che spedît nol è.
A chest pont jo ur domandi ai inteletuâi, ai predis, ai mestris, ai studiâts, a di chei che inte ete di Mieç, o Medioevo ju clamavin “clerics”: «Sêso metûts par judâ un popul a vivi o par firmâ certificâts di muart? Ise dute li la vuestre virtût? Contentâsi di cjapâ at, di constatâ, di scribiçâ liniis di tendence? Cemût us vanzial di acusâ la int che no à voe di nuie se fint ore e je stade la uniche a tignî sù chei valôrs culturâi, sociâi, morâi che a fasin un popul? Invezit di continuâ a dâ judizis fûr di plomp stant fûr dal agâr dal popul e de storie, no saressial il câs di fâsi vualtris un bon esam di cussience? Se no sês rivâts a judâ la vuestre int che us à furnît e il sanc e la fonde culturâl e i mieçs par studiâ, rivarêso almancul a vergognâsi e a pintîsi?». No son domandis retorichis, parcè che i problemis no son retorics ma tragjicamentri reâi.
Se o vessin di dâ un judizi dal Friûl di chest ultin secul e soredut di chescj ultins agns, o scugnaressin concludi che nol è il popul che al à falît, ma i studiâts. Il popul la sô part le à puartade indenant, e cun braure. Baste cjalâ il svilup teconologjic, la capacitât imprenditoriâl, la sgrimie tal cjatâ fûr simpri gnovis stradis e tal viergi simpri gnûfs marcjâts. Là che un secul indaûr a levin a vuadagnâsi il pan, cumò a van a viergi fabrichis, di imprenditôrs, cun tant di golarine e di titul di studi.
No, il Friûl “materiâl” nol à falît. Al à falît il Friûl politic e chel culturâl, dongje di chel glesiastic. E chei che a vevin di deventâ la lûs e il sâl, a son deventâts parassits, int mantignude che e supe la medole culturâl dal nestri popul e ancjemò sore i spude e lu umilie disint che nol à culture e che nol à valôrs.
No vuei fâ une graduatorie in negatîf di cheste int che e à vût tant e che e à dât cussì pôc, par no dî nuie.
O podarès cjapâme cui mestris e cui professôrs, che a son stâts i plui grancj colonizadôrs dal lôr popul. Se jo o fos stât intal guvier talian, ur varès dade la medae di benefatôrs de unitât taliane. Se no àn rivât a fâ l’Italie (che di fat, finide la scuele, ognun al torne tal so “particulare” e tal so semianalfabetisim), a àn rivât però a umiliâ une int za umiliade, disint e fasint capî in dutis lis manieris che la nestre culture no valeve nuie in confront de civiltât fatâl di Rome e che al valeve plui un mus talian che no un dotor furlan. Cuant che un studiât al rive a fâti vergognâ di te e de tô tiere, mi domandi se al è studiât e ce che al à studiât. E paiât cui nestris bêçs.
Dongje dai mestris e dai professôrs, che a àn brilât pe lôr vore negative (o stin fevelant di culture, no di erudizion e di professionalitât), o vin la sdrume dai studiâts che si son degnâts di studiâ la lôr int come che si va a studiâ lis paveis o lis raritâts. Rude academie, nissune afetivitât, stime nancje discori. Cuant che un popul, che al è la uniche realtât vive e vitâl, al ven doprât come ogjet di studi, o sin, come moralitât, a nivel di inmoralitât. Cuintri nature. E chest lu àn fat buine part de intelighenzia furlane.
O vin po lis “stars” furlanis, che a brilin tal firmament talian e internazionâl parcè che a àn puartât suntun nivel plui alt e slargjât une culture za condanade. A son talians, a fevelin e a resonin par talian, e si sintin come chei missionaris che a van inte Amazonie a cjapâ sù lis ultimis peraulis des tribûs in angunie. No par judâlis a riscatâsi, disponûts a murî cun lôr, ma come testimonis di un fat che impen di fâur dulî il cûr ur permet di fâsi biei intal grant breâr de culture uficiâl.
A son traditôrs dal lôr popul, ma si sintin benefatôrs, parcè che al è za un plasê che lôr a pierdin timp e dons par une categorie culturâl cussì meschine. A salvaran cualchi toc, cualchi sun, cualchi inmagjin par sistemâlu tun museu etnografic ideâl.
No plui in là “parcè che nol è il câs, cumò che si va viers la letaradure mondiâl”.
A cjapin premis vendint la piel e il sanc de lôr int. E no àn nancje il pudôr di dîur graziis a di chei che in gracie di lôr a an podût fâsi un non. Invezit a fasin come chel fi snaturât che al jere lât a sporcjâ su la tombe di sô mari. Volêso une prove? Cualchi non? Sgorlon, che al à vinçûts i premis doprant l’”humus” culturâl furlan, al va disint che un Stât nol à di strassâ bêçs par une lenghe e une culture limitade e aromai muarte. E no si vergogne a lâ a sgarfâ tun cimiteri par fâsi un non. Dongje di lui no pues no meti un pari David Marie Turoldo, “eterno emigrante” come che si definìs lui, o “ebreo errante” e sigainar come che lu definìs jo. Un om che si è simpri vantât des sôs lidrîs furlanis e che al fevele par talian parcè che al à robis masse impuartantis di dî. Un om che al à bandonât il Friûl di sô volontât, e no come i nestris emigrants che a scugnivin lâ par fuarce, e che ogni volte che al torne dongje par une fieste o par une medae,
“al cjate il so Friûl simpri mancul Friûl”.
Ma se ducj a fasevin come lui, nol varès cjatade nancje la tabele stradâl che e segnave il Friûl.
Par chel o dîs che si varès di vê plui clarece cun chescj “mostros culturâi”. Invezit di lâ a domandâur la caritât di une sbitiade, si varès di fâ come che si fâs cui parassits: spesseâ a distacâju de plante prime che a finissin di supâi il bon e di copâle. Naturalmentri, par parâju vie a buinis, si podarès ancje dâur une medae. Di mus.
(La Patrie dal Friûl n. 3-4 avrîl 1989) ■
pre ANTONI BELINE
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +