MEDITANTLIS TAL SO CÛR. pre Pauli Varut

E jere une sere di domenie e pal barcon dal ospedâl di Udin e jentrave la lûs di un soreli che si preparave a lâ amont. Si distudave la lûs, ma in chei moments si sfantave ancje la ultime spere di lûs dai voi di un amì, di un predi che mi à fat une vore di ben. O ricuardi ancjemò: la ombrene si slungjave te stanzie, un suturni cidin al cresseve, il marum nus strenzeve; in ponte di pîts e jere rivade la muart.
Pre Pauli Varut al jere nassût a S. Vît di Feagne ai 21 di Novembar dal 1943, la dì de Madone de salût, e al à lassât chest mont ai 20 di Zenâr dal 1985, juste 25 agns indaûr.
O vin studiât par agns intal stes ‘seminari e daspò lui al jere partît par Verone in prevision di une mission in Americhe latine. Al sarès tornât in Friûl menant cun se une svintade di spiritualitât dute gnove che e vignive de France, dal moviment dal Pradò, dai coments al Vanzeli dal Pari Chevrier e de amicizie cun bons. Ancel vescul ausiliâr di Lion. Une pagjine di pastorâl dute gnove, di dialic e di revision di vite che nô, tal ‘seminari di Udin, no varessin mai inmagjinât.
I superiôrs di chei timps a sintivin che l’istitût diocesan al criçave e al jere come une cite a pression, e a cirivin di rapeçâ zontant alc di gnûf cence tocjâ il telâr vecjo.
Pre Pauli al podeve jessi l’om just tal puest just. Bisugnave dome doprâ lis sôs cualitâts e tignîlu di voli. Al durà pôc. Dopo variis vicendis si cjatà a fâ di plevan a Vasinas, “in partibus infidelium” par formâ une comunitât di predis a servizi di dute la zone.
Il gno incuintri cun lui al è tal 1973 e mi à segnade la vite.
Personalitât ben marcade, om di grande umanitât, predi di spiritualitât profonde, libar tes decisions e sclet te peraule, al veve un grant amôr pal Vanzeli che al comentave cjalant ai puars e a lis esigjencis dai paîs.
I vevin dit a pre Antoni Beline che al ves fate une biografie sore di lui ma pre Pauli, par chel che si sa, al à lassadis tantis notis di predicjis, di esercizis spirtuâi e di incuintris ma no un so diari da la anime. E reste cualchi letare, ma masse pôc. E cussì pal moment o scugnìn contentâsi dal bonsavôr di chei che lu àn cognossût e des notis di pre Antoni intal libri su pre Checo Placerean.
Di lui o ai tancj ricuarts personâi che o puarti cun me; lu consideri il gno pari spirtuâl di chei timps e i soi ricognossint di dut il ben che mi à fat.
Dongje di lui a son pre Checo Placerean e pre Antoni Beline.
Se o ves di fâ un lôr ritrat midiant di une inmagjine, par pre Checo o disegnarès il rocul sore di un çuc, par pre Antoni une violute tal ricès e par pre Pauli un vâs di veri cuntun biel sclopon.
Personalitâts tant diferentis ma dutis trê cjapadis de passion pe glesie di Aquilee e pe diocesi, peadis al popul furlan che, al disarès pre Checo, al à di jessi cul cjapiel sul cjâf.
O conclût chescj pinsîrs cuntune vene di marum parcè che ancje pre Pauli al parten a chei predis e esperiencis che a àn luminade la nestre glesie dopo dai agns ’70; di lôr si pues dî ce che al è scrit tal Vanzeli a proposit di Zuan il Batiste: “Ma jo us dîs che Elie al è za vignût e no lu àn ricognossût; che anzit lu àn tratât come che ur à parût”. (Mt 17,12).
Cun chei predis, un grant moment di profezie pe nestre glesie si è distudât e une ocasion uniche e je lade pierdude; a son stâts come lis stelis che a dan une sflameade tal cîl e a sparissin; e il cîl sore di nô al è cumò plui pesant e plui scûr.
Un Calvari trement, un tumôr dolorôs al à marcât l’ultin toc de vite dal gno amì; zornadis e mês che lui al à vivût cun grande umanitât, semplicitât, pazience e preiere.
Di pre Pauli, il libri de Sapience al disarès: “Rivât in pôc timp a la perfezion, al à fate une lungje strade”. (Sap. 4,13)
Al polse tal cimitieri di Bordan. Pe sô tombe al à lassât scrit: “La fede e je la robe plui preziose de vite”.
pre Tonin Cjapielâr