MEDITANTLIS TAL SO CÛR. Mandait a visâ l’imperadôr

«Mandate a dire all’imperatore»: cheste golaine di poesiis di Pierluigi Cappello mi rimande subit a cuant che o jeri frut e in biciclete di Dogne o rivavi jù a Scluse che in chei timps e jere par me une citadine.
Passât sot dal puint de ferovie e dongje des ultimis maseriis des gloriis de Ete di mieç de «Chiusa», a çampe si slungjavin lis casermetis dai soldâts e daspò e rivave la cjase di mê agne Line di Cuestemulin, la farmacie, la cjase dal dazeâr e de mestre Tel e la ostarie dai Catufs li che inte cjamare parsore e consumave il so calvari Luciana, che e sarès muarte zovine, dopo agns di jet, par vie di une malatie che no perdonave.
Sui sdrups di Scluse, dongje de Fele, intai frêts dal Cjanâl a son stadis concepidis chestis rimis di Pierluigi par cuietâ la anime dai tribulâts, rindi poesie ce che al jere stât prose e pandi la realtât cence strafaniçs, cence: «fulgido esempio» «sublime olocausto» «eroiche truppe».
Però, mandait a visâ l’imperadôr che chestis rimis no cjolin nuie al frêt che si veve tes cjasis, ai camarins vueits, a lis disgraciis parturidis de miserie, de emigrazion, de mancjance di istruzion e di lavôr, des distruzions teribilis des vueris.
Cuant che o lei lis poesiis di Pierluigi o sint la sensazion – mandait a visâ l’imperadôr – che te vite dai ultins nuie al cambie. In chês imagjins o cjati un destin li che dut al è fer, un Prometeu che al pues cerçâ alc di amôr, di biel, di pâs, di mistic ma che al reste blocât e incjadenât. Cence scomponi la mitologjie greghe, o disarès che chest poete al à in sè la anime furlane: chel savê che di paron in paron – mandait a visâ l’imperadôr – intal ultin scjalin no vîf redenzie e che tal Salet, a Tamaroz, tai Strez d’Invier ancje il soreli al scjampe.
Mi congratuli cun Pierluigi pal premi Viareggio: un ricognossiment che lu cualifiche lui, ma ancje dut il Friûl. Però mi plâs pensâ che chest om al à alc di plui impuartant: la sô fuarce interiôr che lu à fat superâ deserts cence pistis e gnots di burascje cence stelis. La sô poesie mi cjacare, intant che la sô vite mi jude, mi da fuarce e mi insegne.
Ma cumò o torni viers Scluse, o cjali Racolane, o viôt lis cjasis gnovis, mi domandi: jerial miôr il paîs vîf di cuant che Pierluigi al jere frut e che lui al contemple te poesie, o il paîs di cumò che fat di cjasis gnovis si cjate in agonie?
O sin restâts ancje in zornade di vuê cence ni dignitât ni onôr, intal ultin scjalin li che nuie al cambie.
Al è cussì; mandait a visâ l’imperadôr.
pre Tonin Cjapielâr