MEDITANTLIS TAL SO CÛR. Cul cjapiel sul cjâf

Cheste volte la int dal Friûl si è presentade in public come che pre Checo al varès volût: cul cjapiel sul cjâf. Di fat l’event de leture continue de Bibie par furlan, concludût Sabide ai 9 di Avrîl, al è stât un moment unic che al restarà te nestre memorie; une buine semence che, o speri, e produsarà ancjemò une vore.
A son lusôrs che a sucedin di râr. Jo in particolâr, o ricuardi i grancj moments daspò dal taramot cuant che la int si deve dongje tai Comitâts des tendopolis e la racuelte des firmis pe Universitât a Udin cjapadis sù fra lis maceriis.
A jerin moments che a segnavin la vite.
Si disarà che une sflameade no fâs un fugaron. E pant però un fat: che lis boris sot de cinise a son e ce che al someave distudât al è plui vîf di chel che si crodeve. Dal rest il multimediâl che nô si cjatìn, no isal ancje un fûc artificiâl cence boris, cence sostance, cul nuie di daur? Chest però nol è il nestri câs.
Mi displâs che te presentazion dal Event, il Vescul nol vedi nomenât i doi protagoniscj de traduzion de Bibie par furlan: pre Checo Placerean e pre Antoni Beline. Mi somee, chest, un segnâl che il libri sant al cjate ancjemò ostacui intes gjerarchiis. Di fat, coments de Bibie furlane par furlan a son rârs come lis moscjis blancjis. Nol è ancjemò sucedût te plui part dai predis zovins e no zovins ce che al è scrit tal libri dal profete Ezechiel: «Fi dal om, mangje chest rodul; po va a fevelâi a la cjase di Israel». La nestre glesie, chest rodul de Bibie par furlan no lu à ancjemò mastiât
e tant mancul glotût e digjerît.
Chest event al reste però un segnâl pal mont politic e glesiastic. Ducj, dopo chest fat, a varan di cjapâ cussience e grinte par sburtâ indevant
la nestre identitât linguistiche; la diocesi, in plui, e varà di insisti pe aprovazion dal Messâl roman par furlan e e varà di ricjapâ la Comission
pe traduzion dai tescj liturgjics inte nestre
lenghe mari.
Dut al è lât plui che ben. Al di là di chest, la Bibie e reste il nestri libri e ognun di nô che al pensi al profete Ezechiel li che al dîs: «Lu mangjai, e al deventà te mê bocje, dolç come la mîl» (Ez 3,1-3). Par chest mi plâs concludi
la riflession cuntun pinsîr di Dietrich Bonhoeffer sul Vanzeli e la vite di Gjesù: «Nô o vin di metisi dentri ogni dì di gnûf, par tant timp e cun grande calme, inte vite, intal mût di fâ, intai patiments
e inte muart di Gjesù par olmâ ce che Diu
al promet e ce che Diu al manten.
Chest al è sigûr: che tal patî e je platade la nestre contentece, tal murî il nestri vivi, e o podìn stâ sigûrs che in dut chest si cjatarìn tune comunion di amôr che nus condûs».
Al è su chescj trois mistereôs che ancje l’event nus invide a cjaminâ.
pre Tonin Cjapielâr