Se o podessin tornâ indaûr di 25 agns, in Friûl o cjataressin almancul 12 bancjis cul centri decisionâl chenti. Cumò a son in pratiche sparidis. La ultime le è a pene regalade (cence nancje fâ masse fature a contratâ il presit) la Regjon: si trate di Mediocredito, la bancje regjonâl che intai ultins agns e je deventade un poç cence fonts. «Un pês di molâ al prin cocâl che le ves cjolte», a àn dit in tancj: fintremai Stefano Miani, professôr de Universitât di Udin, al veve dit che cheste bancje e leve regalade. E Debora Serracchiani e il so assessôr Francesco Peroni lu àn scoltât: e di fat a àn dât vie la maiorance des azions in gracie di une intese cun Iccrea (la centrâl des Bancjis di Credit Cooperatîf di Rome) che e met a disposizion dai partners talians il 51% dal patrimoni midiant di un aument di capitâl. Si disarà, e e je vere, che lis tantis pierditis di chest istitût di credit a vignivin regolarmentri cuviertis cui bêçs dai citadins di cheste Regjon: ma propit par chest, dâ vie une bancje salvade cul jutori dai contribuents al varès di jessi un passaç une vore delicât. E trasparent.
La storie, invezit, e je stade diferente: la cuistion e je stade rivelade in Consei regjonâl cuasi par câs. Nissun dal Consei al à duncje savût nuie prin dal belanç, e la tratative e jere bielzà stade completade. E va ben che si fevele di segrets bancjariis, ma no sin mighe in Svuizare…
Disvelade cheste tratative “platade”, parcè no varessino di jessi contents? Parcè che di trasparence no si pues fâ cence. E alore nol è masse clâr parcè che la Regjon, se e voleve imbastî un dialic cul mont dal credit cooperatîf, e vedi pontât viers di Rome e no viers Cassa Centrale di Trent, che e tire dongje 11 Bcc furlanis su 15. Parcè sielzi Iccrea che des bancjis di chenti no veve vude masse fiducie?
Un altri misteri al rivuarde il rûl de Fondazion CrTriest. Un pont di riferiment di fonde par Mediocredito, parcè che al veve une partecipazion di 34.440.610 azions cuntun valôr nominâl di 1 euro par ognune. La Crt intal belanç consolidât 2016 e veve svalutade integralmentri la sô partecipazion, parcè che, in gracie des informazions a disposizion, no jerin lis fondis par garantî la continuitât aziendâl. Il valôr medi cjamât par ogni azion al inizi dal esercizi finanziari al jere di 1,2892; e al è dut un colp deventât zero, cussì la svalutazion e jere calcolade di 44.403.533 euros. Cumò, dut un colp, chês azions a son tornadis di valôr: e CrT e pues vendilis jentrant, e al è il prin grup bancjari privât a fâlu, intal asset societari di Iccrea cuntun concambi nuie mâl. Cemût isal pussibil dut chest? Finance creative? No, i credits deteriorâts a son sparîts e la Regjon e à ricapitalizât cui bêçs dai siei citadins. Par chest la bancje e faseve gole a tancj, ma dome une tratative e je stade puartade indevant. Par un periodi si jere fevelât di une mega ufierte di un grup forest, ma nol è mai saltât fûr pardabon se la robe e fos stade vere o no.
Dut câs, cumò si spietin lis autorizazions de Bancje di Italie e soredut de Bancje Centrâl Europeane. Nol è dome un judizi di forme, ma di sostance, par verificâ se a son stadis rispietadis dutis lis normis. E se la procedure e larà in puart, il credit si slontanarà ancjemò di plui de nestre Regjon. Il sparagn al svole inaltrò: e il dubi che lis nestris fameis e lis nestris impresis a varan di sigûr cualchi jutori in mancul no nus al gjave nissun.
di Walter Tomada