Sfuei Mensîl Furlan Indipendent
Archivi de Patrie

Marco Brosolo nus fevele di “Cadremo Feroci”, il so ultin album su la scuvierte di Federico Tavan

............

Marco Brosolo e Federico Tavan
Marco Brosolo e Federico Tavan

«Se e je vere che jo e Tavan o sin maledets, e pues jessi dome la maledizion dal diu bêç e di sô ecelence il business. Nol esist calcul che al puedi misurâ lis nestris nulitâts. La ferocitât de colade e je otignude dal infinît che al sta sot. Un svol sbranât in colade feroce.»
Cussì l’artist e musicist furlan/berlinês Marco Brosolo si descrîf cuant che lu intervistìn par domandâi dal so ultin album, jessût in Setembar, che si concentre su la figure dal poete Federico Tavan. Daspò Volo Sbranato dal 2013 – un titul che al rapresente l’anagram dai doi cognons, Brosolo al realize un gnûf lavôr che al puarte il titul “Cadremo Feroci”, anagram, chest colp, dai nons dai doi artiscj.
«O ai decidût di zuiâ cu lis letaris e cu lis peraulis, e il câs nus à dât chestis frasis, che a son leadis cun dute la vicende. Leint Tavan jo o mi sint ben, come viodimi intune sorte di spieli, une riflession da la anime. O sint di apartignî a chel toc di univiers che al fevele Tavan e par chest motîf o ai volut rapresentâ cheste mê adesion midiant dai anagrams, un zûc che a ducj al pues fâ cjatâ coincidencis che tant a disin».
UN DISC VISIONARI
Cadremo Feroci al è un album plen di visions dulà che tancj ospits de sene musicâl europeane a fasin part. Ducj i musiciscj coinvolts, come Pierpaolo Capovilla, Bobby Solo, Dominique A e Barbara Morgenstern, Toni Kater, Rudi Moser e Robert Lippok, nus dîs Marco, in mûts e plans diviers a son Tavan e o soi convint che Tavan al jere za dentri di lôr.
Lis cjançons a son interpretadis par talian, todesc, inglês, francês e gjaponês, propit parcè che lis composizions di Tavan, lassant stâ la lenghe stesse cu lis sôs sonoritâts, a son universâls, no àn pôre di jessi tradusudis. E cussì al è nassût Cadremo Feroci, par dâ un cuarp di suns che si associe aes sensazions che Tavan al à fat nassi in me. Lu amiri pe sô capacitât di sintesi, parcè che al sa jessi intens, profont e sempliç al stes timp e parcè che al è stât bon di fevelâ dal om in maniere assolude e ancje evitant inteletualisims cence sens”.
I CONTIGNÛTS
L’album si compon di nûf tocs e, ancje se Brosolo nus dîs che descrivi la musiche cu lis peraulis al è come bussâ cu la lenghe un manichin in plastiche, nus spieghe tacant dal prin toc:
Eternità – vistude di maron, smangjade e ruspie, cence formalitât, gruesse, che e finìs za cuant che e scomence. Pensiero – une saune distrutive, un drame che ti gjave vie lis fibris dal cûr cence lassâti avilît. La pleine voix – plene di vueit, che no ti lasse di bessôl. The monster – la bella e la bestia a son dutun. Parabola – un deliri rotatori, un respiri eletronic lent e lunc. Gno nonu – il glaçâsi dal assolût. Wäre ich normal – il moltiplicâsi dal amôr che nol esist, che za in partence al è masse grant. Dalle mie parti – un cisic di cjant tabaiât, une viertidure, un tuf. Albero – noturne e un pôc luminose, une albe al tramont. E cun chest ultin toc al è stât publicât ancje il video, che i à permetût a Marco di zuiâ cul so aspiet, che al deteste. In plui dal video, ancje la cuviertine dal album e je pal vêr particolâr. Doprant il granît de “Rivetta” di Vignesie tal font, l’artist Alvise Bittente al mimetize contest e sogjet par piturâ parsore il titul dal disc cul zâl de senape e il ros dal ketchup.

ATOR ATOR

A Dicembar o varìn il plasê di ospitâ Marco Brosolo a Udin e lui nus dîs di jessi seneôs di lâ a Andreis, il paîs di Tavan. Nô duncje, in plui seguî l’artist e di scoltâ lis sôs cjançons, o podìn fâ in mût che il so sium al deventi realtât.
Lu lassìn che nus lei la sô poesie preferide: “Penseir pa’ la fin da’l an” di Federico Tavan. ❚
––––––
Penseir pa’ la fin da’l an
No me ferme
mai
a fâ bilancjus.
E soi un flum
che zint a
murî
in tal mâr
al mozena
sgrifa
carecja
claps
cencja
pensâie sora
un parcêe
s’a val la pena
s’al riva ad ora
s’a se ferma
prima
––––––
Moira Pezzetta

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +