Mandi “mestra Ana”, riferiment pal Friûl orientâl e no dome

In tancj le ricuardin tant che une femine sincere, legre e zentîl. Anna Bombig, o come che le clamavin “mestra Ana”, e jere une figure une vore stimade no dome tal so paîs, Fare dal Lusinç, ma in dut il Friûl orientâl.
Nassude tal 1919 a Florence si trasferì in Friûl dopo de prime vuere mondiâl cu la famee; di fantate e tacà a insegnâ talian tes scuelis in Slovenie, po dopo ancje in diviersis scuelis dal Friûl orientâl.
Fin di subit la sô passion pal insegnament e pe culture le puartà a interessâsi ae lenghe furlane e a pandile di fûr dal sôl ambit familiâr, scrivint e publicant centantis oparis. In particolâr e fo socie onorarie de Societât Filologjiche Furlane dulà che par tancj agns e curà i contribûts su “Voce Isontina”, “Strolic furlan” e “Sot la nape”. Oltri a sedi insegnante e jere ancje scritore di prose e di poesie, tant che diviers siei viers a forin metûts in musiche di artiscj tant che Cecilia Seghizzi, pre Narciso Miniussi e Giovanni Mazzolini.
E propit la musiche e fo une altre sô grande passion, tant che e deventà diretore dal coro parochiâl di Fare.
Come che e ricuarde une altre mestre e amie de siore Bombig, Milvia Zuttion, «la musiche e jere une grande passion di Anna; in glesie a Fare, prime di saludâle pe ultime volte, i vin dât il bon acet cu lis peraulis di “Suspîr da l’anime”, une cjançon che jê e amave tant cjantâ in compagnie».
Ancje Roberta Zuttion, mestre, e ricuarde cun afiet cuant che la Bombig a buinore e meteve adun ducj i frutins de scuele dulà che e insegnave e ju faseve cjantâ: «La mestre Bombig e amave tant il cjant e la musiche e e cirive di trasmeti cheste sô passion ancje ai frutins».
Dut il paîs di Fare si è dât dongje pal ultin salût a “la mestra Ana” che ducj a amavin e a ricuardavin cun afiet, femine di grande culture e umanitât, tant che la aministrazion comunâl e à decidût di dedicâi la biblioteche par memoreâ ce che e je stade Anna Bombig pe comunitât e pal mont de culture furlane. ❚
✒ Redazion