Un dai lûcs dai Pagans in Cjargne
Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje part de associazion “Carnia Greeters” –. O ai simpri viodût un grant interès tant des personis che o puarti achì che di bande dai miei paisans; al è un lûc che al à tirade ancje la atenzion dai studiôs. Il prin al è stât il storic Giovanni Gortani che, tal 1894, al à fat un tratât sui Pagans intes liendis; Giovanni Marinelli al à nomenât chescj lûcs inte sô vuide de Cjargne sul finî dal ‘800. Ma chel che al à dât plui rilêf al puest al è stât Alfredo Lazzarini che, tal 1904 insiemi cun Luigi Gortani (pari di Michele che al à creât il Museu das Arts Popolârs di Tumieç), a àn fat un sorelûc e a àn cjapât sù lis liendis e lis testemoneancis. Luigi Gortani al à dissegnât par prin la plante dal insediament. Cualchi an indaûr, cun cheste mape o vin podût – dutune cui tecnics de Sorintendence – lâ sui lûcs e confermâ la posizion di ben cuindis cjasutis. Tocje dî che ancje la val di Incjaroi e je stade metude sot studi: sore Treli al jere un altri insediament cu la capele dai Pagans, e cussì ancje a Cjabie. L’insediament plui grant e cun plui cjasis al è chel di Cjarsovalas. I Pagans a vivevin intun lûc in maniere autonome: no jerin cristianizâts e si conte che a adorassin il Bec di aur. A Cjarsovalas al jere un grant anfiteatri, e di piçule mi impensi che al jere come viodi une grande pradarie.”
◆ Tal 2018 a son stâts fats i ultins intervents e i studiôs a àn podût esaminâ, cul supuart de tecnologjie, dute la zone, e ancje sgjavâ tal sît in corispondence di dôs abitazions. Inmò nol è stât pussibil stabilî la epoche dal insediament uman.
◆ Di chest si à fevelât ai 25 di Març dal 2023 te glesie di Sant Martin di Val e Rualp, te interessante cunvigne “Jenfri storie e liende: Cjarsovalas e i lûcs dai Pagans in Cjargne. Une prospetive archeologjiche”, e ai 6 di Avrîl cu la visite vuidade tal sît archeologjic.
◆ “Il lûc al è interessant – e va indenant Fides – e secont me al è un tesaur di svilupâ. Se si pense ae storie, par solit si fevele dome dai grancj personaçs e no je mai stade dedicade trope atenzion ae int normâl, a cemût che e viveve. Parcè no tacâ a cjalâ di plui e a dâ valôr ae storie e al mût di vivi dai nestris Pagans, par esempli? Mi plâs insumiâmi, e chest sît lu viodarès valorizât prin di dut cun altris sgjâfs, se la disponibilitât economiche lu permet, metint in sigurece chei che a son za; a volaressin creâts sul puest cartelons cu lis indicazions storichis, magari cun tant di QR, cussì ognidun al pues aurî aes informazions cuntun clic sul celulâr. O fasarès dissens esplicatîfs, o ripristinarès i trois di chei lûcs dant vite a percors naturalistics, e o fasarès une fieste pagane. Dal sigûr fâ cognossi e valorizâ chest puest nol risolvarès ducj i problemis de mont ma al judarès a rivitalizâle e a dâ cualitât ae vite dai nestris comuns. O speri che dal passât e rivi une sperance e une ciertece pal presint”. ❚
