“MAFIE” no je une peraule dome taliane!

A àn cjapât Matteo Messina Denaro! Chest fat nus lasse viertis dal sigûr tantis domandis e al met in biele mostre ce che salacor al è il pivot plui fuart, là che si poie la realtât de mafie: la omertât. Ma e je une cuistion inmò plui grivie e e rivuarde la complicitât o – no volìn pensâ – la poie des istituzions.
◆ Ma cheste volte no cjacararìn de Italie, che intes Gjermaniis e je viodude tant che tiere di latin lovers, spaghets e soredut MAFIE. La convinzion, par altri, no si riferìs nome al Sud: par tancj di lôr ducj i talians a son mafiôs, di Tarvis injù. O ai insegnât par tancj agns il talian in Austrie e il berdei plui dificil di disgropâ nol è stât chel des coniugazions, ma chel di rivâ a discreditâ chescj prejudizis. E cualchi volte o ai scugnût fâ cuintri a docents di lenghe taliane, che a trasmetevin chescj stereotips ai arlêfs. Par agnorums o ai cirût di fâ capî che la mafie no je scomençade cun Totò Riina e personaçs su chel stamp, che forsit a son dome la risulte finâl e piês, ma e nas su mûts di fâ che a somein cence rilevance, che planc a planc a jentrin inte vite di ogni dì e dispès a vegnin ancje cjapâts dentri tant che regolaments intes istituzions, che a son masse cjadochis par rindisi cont.
◆ O ai podût viodi di persone cemût che tancj fenomens mafiôs a sedin ben inlidrisâts ancje intune tiere come la Austrie – e no stoi fevelant di mafie di importazion taliane, si ben di manifestazions nassudis là – che e somearès parsore di ogni suspiet, se nol fos che o ai scugnût patî di persone cierts compuartaments.
◆ In Austrie la manutenzion dai implants di riscjaldament no je obligatorie nome pes cjalderiis a metan o a gasoli come in Italie, ma par cualsisei fate di riscjaldament, e si che duncje ancje par une stue a lens e pal so cjamin. Pai implants a gas e gasoli si àn di fâ doi intervents ad an, biel che pes stuis a len si scuegnin fâ cuatri di oblic, notâts suntun libret di pueste. E fin achì o podaressin dî che al è complicât, costôs, ma ae fin al garantìs une buine sigurece. Dut vêr, ma dut al cole cuant che si scuvierç che par chestis manutenzions a son stâts autorizâts nome doi o trê spachenapis, daûr dal numar dai abitants dal comun, e no si pues lâ fûr di chei: o si sielç un, o si sielç chel altri. Al è clâr par ducj che un sisteme di cheste fate al puarte a prepotencis, insolencis, abûs e in cualchi câs si rive ancje a menacis ai citadins che a fasin cuintri a propuestis di meti sù implants une vore cjârs ma dal dut inutii, che no son nancje previodûts des leçs. In câs contrari, a cualchidun i ven dineade la conformitât de manutenzion, fat che al ven comunicât aes autoritâts cu lis consecuencis di multis che a puedin costâ une vore. Ben clâr che il sisteme al somee democratic, stant che si pues cambiâ il furnidôr dal servizi, ma dome une volte, e si capìs subit che si pues finî intun cercli viziôs.
◆ In sumis, al è clâr che une cuistion di pocje valence come la netisie di un cjamin e pues fâ nassi compuartaments che no àn nuie di invidiâ cul sisteme mafiôs, che nus acusin simpri. Ben clâr che no son inmò a nivel di grandis organizazions, ma se a continuin a paidî chestis andis, il pas par lâ in piês al sarà une vore curt.
◆ Bisugne però fevelâ ben di ducj chei spachenapis che a fasin il lôr lavôr cun onestât, coretece e disponibilitât, cence profitâ des sclapaduris. Dopo cualchi probleme cun doi di lôr, o ai vût la fortune di vê il servizi di un propit brâf e onest. ❚