MAÇALIZI. Un cavîl a teatri sot judizi di chei che a cjalin

Ce vuelial dî Maçalizi? Lu podês scuvierzi lant a teatri, a viodi la version furlane di “Le Dieu du carnage”, la comedie de dramaturghe francese Yasmina Reza, voltade par furlan di William Cisilino e Michele Calligaris, cu la regjie di Fabrizio Arcuri e Rita Maffei. I atôrs a son la stesse Maffei, Fabiano Fantini, Massimo Somaglino e Aida Talliente. Une produzion CSS Teatri Stabil di Inovazion dutune cun Mittelfest 2022, indulà che cheste opare e je lade in sene pe prime volte l’Istât passât, tornant po dopo tal mês di Avrîl a Udin par une serie di rapresentazions tal Teatri Sant Zorç e a Çarvignan tal Teatri Pasolini. Sperìn che a ’nt vegnin altris daûr.
◆ La sene indulà che si davuelç la storie e je tal centri dal teatri, intune sorte di stanzie sot veri che al è un tinel, e il public tor ator. Al è dut colôr vert aghe: la mobilie, i diviers ogjets, i vistîs dai cuatri personaçs. E dut si scolte midiant di auricolârs, tant che al pâr di jessi li a spiâ come voglons, int che e cjale cun curiositât esagjerade, intune atmosfere sureâl, intun lûc che al somee un acuari par umans.
◆ La liende e viôt dôs cubiis, la prime componude di Michele e Veronica, la seconde di Anna e dal avocat Alan Conti. A son a cjase dai prins doi par cirî di risolvi insiemi une cuistion. I lôr fîs, ducj i doi di 11 agns, Bruno e Ferdinando, si son pacâts fûr di scuele, e il prin al à vût un bon traume, cun doi dincj rots. Lis dôs fameis, che a son li par risolvi la cuistion in maniere resonevule, a jentrin intun mecanisim stramp indulà che i discors a van di volte in volte simpri di plui fûr dal teme principâl, e si misclicin cun storiis personâls, incomprensions di cubie, discussions tra une e chê altre famee, par tornâ in maniere convulse sul teme dai fîs, e daspò rivant a dâsi colpis di ogni gjenar un cul altri. Intant il telefonut dal avocat al sune di continui par vie dal lavôr, i discors a cjapin ogni volte une ande divierse, storiis di cuotidianitât ordenarie si intiziin su argoments di plui grant respîr, par tornâ di pont in blanc a tratâ de ordenarietât, e dut al è un tirâ e molâ che al met gnervosisim, ma no mancje la ironie. Fin che a un ciert pont, par vie ancje di un rum che ducj a bevin – tacant di un got fint a disvuedâ la butilie -, al sucêt un patatrac.
◆ Ma nol è il câs di disvelâ dut, parcè che e merete lât a viodile cheste comedie, indulà che i diviers personaçs a son personificâts une vore ben dai atôrs, tant che la lôr part e je di gale, e l’intric psicologjic che si discjadene al puarte cui che al cjale, come un spion, a ridi e a stâ seri, a pensâ, cun lizerece, ma no masse.
◆ Une atenzion particolâr i va dal sigûr al ûs des lenghis: il talian pes discussions uficiâls, formâls tra une cubie e chê altre, sul imprin, e il furlan usât dispès pai dialics internis, tra om e femine, come lenghe familiâr, de intimitât, de confidence. Ma di volte in volte cheste dinamiche si creve simpri di plui, tant che a un ciert pont al sarà il furlan a dominâ i lôr discors, i lôr cavîi, lis lôr discussions animadis. Une comedie bielonone, recitade di atoris e atôrs parons dal lôr mistîr. Une storie che e merete viodude e scoltade. Lait a teatri. ❚