Sfuei Mensîl Furlan Indipendent
Archivi de Patrie

Luca Melchior, l’interès pal Friûl al devente ricercje ator pe Europe

Serena Fogolini

Storie di un professôr furlan tal forest
Tacant dai prins agns Novante, in gracie di un progjet de Universitât di Clanfurt, in colaborazion cun altris Ateneus, la localitât di Pleç (Slovenie) e je deventade mete estive di studis e di incuintris di caratar internazionâl, cun grant atrat di bande dai students universitaris.
Il diretôr di chest an, professôr Luca Melchior, nus conte di cemût che si è disvilupade vie pai agns cheste iniziative.
La scuele estive di Pleç e je nassude par iniziative di un storic de Universitât di Clanfurt, Andreas Moritsch, in colaborazion cu lis Universitâts dal Friûl e di Lubiane. La idee e jere chê di un laboratori di confront su la storie di cheste regjon, che e je comune, ma masse dispès dividude e insanganade. I cors di lenghe – sul prin talian, todesc e sloven – a jerin nome funzionâi al scambi tra i students e i docents, parcè che si voleve doprâ lis lenghis de regjon e no l’inglês. La idee e je stade puartade indenant di un altri storic, Karl Stuhlpfarrer, e dopo dal pedagogjist Vladimir Wakounig, prin che mi tocjàs a mi. Cui agns si son zontadis lis Universitâts dal Litorâl di Koper, la Universitât di Triest e la Facoltât di filosofie di Rijeka, e cussì si è slargjade la ufierte dai cors ancje al furlan e al cravuat. Gno obietîf al sarès stât di rivâ, tai agns, ancje al ladin, ma prin il covid, daspò la fin dal gno contrat a àn fermât il plan.
__
Cuâl isal il spirt di cheste iniziative?
Il spirt al è chel di un progjet di pâs e di incressite comune, intun dialic tra students dai Paîs de regjon, che dispès a cognossin nome une version, chê de lôr bande, de storie e de culture, in realtât comunis, dal teritori e che – magari cussì no – tantis voltis no san ce che al sucêt, o che al è sucedût, di chê altre bande dal confin. Une robe che nus somee impuartante, dut câs, e je chê di slargjâ ancjemò di plui la prospetive a aspiets plui leâts, par esempli, al disvilup economic e tecnologjic inte regjon.
__
E cumò, invezit, par cognossilu miôr, cuâl isal stât il so percors di studis?
O ai fat studis di todesc e rumen a Udin (cun tapis a Rostock e Timişoara), cuntun pôc di serp-cravuat in bande, formazion di docent di talian lenghe foreste a Vignesie, a vore inte scuele e universitât a insegnâ talian a Lipsie, dotorât in linguistiche romanze a Munic e Udin sui migrants furlans in Baviere, assistent universitari a Graz, professôr di ricercje sul plurilinguisim a Clanfurt.
__
Ce judizi podaressial dâ su la sô preparazion?
Di sigûr positive, cu la pussibilitât di scambis internazionâi e di confrontâmi cun docents preparâts e che, no simpri ma dispès, a savevin ancje acompagnâ i students inte cressite academiche. Mi sarès plasût però vê cognossût il program di Pleç za di student…
__
E sui Ateneus che al à vude maniere di cognossi (di student, ricercjadôr e professôr)?
A son judizis une vore diferents, ma in gjenerâl ancje une vore positîfs. La LMU di Munic e je une universitât storiche e grande, cun tante ufierte e rapuarts internazionâi cu lis universitâts plui impuartantis dal mont; Lipsie e je une universitât cuntune grande storie, ma in chê volte che o jeri jo e veve une seconde zoventût, intune citât vive e dinamiche; Graz e à une grande tradizions di studis romanistics (e sul Friûl), Clanfurt e je intune posizion ideâl pe regjon de Alpe Adria, ma salacor no simpri si sa sfrutâle…
__
Ce progjets aial in cantîr?
O soi daûr a lavorâ cuntun team di coleghis, in primis Franco Finco e Paolo Roseano, suntune gramatiche descritive dal furlan, cun Isabella Matticchio o vin in pîts une bibliografie dai scrits di linguistiche su lis lenghis e varietâts de Istrie, cun Franco Finco e Fabiana Fusco un studi sul insegnament di sauran, sapadin e timauês, e daspò studis sui linguistic landscapes di cheste regjon de Alpe Adria.
__
I capitial mai di fevelâ de lenghe furlane cun coleghis o students no furlanofons?
Sì, fevelâ di lenghe furlane mi capite cuasi ogni dì… ancje te mê cariere academiche l’interès pal Friûl al è simpri stât presint, dai cors su la ricjece linguistiche dal Friûl (cun cors di lenghe furlane) a Munic fin ai cors sul plurilinguisim inte Alpe Adria. In Austrie, in particolâr a Clanfurt, di Friûl si sa avonde, l’interès al è alt tai students. Plui di cualchidun mi à dit che al sarès biel vê cors universitaris di furlan. I coleghis in gjenerâl a son interessâts a aspiets specifics, come la tutele, la standardizazion, il contat linguistic e lis sôs manifestazions, ma ancje la variazion dialetâl o la presince inte scuele.
O crôt che al sedi dificil fâ un confront cul Friûl: tal forest salacor e je plui curiositât, parcè che je simpri une robe “altre”, al è un ategjament viert e il confront cu la situazion des lenghis des minorancis storichis e dai dialets presints achì al è une vore impuartant te cuotidianitât comunicative. Al è clâr che si trate di un toc di societât particolâr – students e docents universitaris -, duncje no rapresentatîf di dute la popolazion.
__
Lavorâ tal forest aial influençât il so mût di jessi e di sintîsi furlan?
Disìn che par ciertis aspiets si pues cjalâ lis robis cun plui “distac”, che nol è mâl, e chest mi da la pussibilitât di lavorâ sul furlan cun calme. Mi fâs sintî che jessi furlan al è un toc impuartant di me, e che jessi furlan al vûl dî dal sigûr fevelâ furlan, ma ancje jessi “fi” di une realtât fate di un miscliç di tantis lenghis, dutis impuartantis.
__
Ce impression aial dal Friûl cjalantlu dal difûr?
Dal Friûl o ai la impression che, a nivel politic, un pôc si piert intun “Nordest” o intune “Norditalie” dismenteantsi di se, des sôs particolaritâts, dal so teritori, de sô storie. Ma par fortune a son iniziativis dal bas, ancje se in chest moment di crisi continue a nivel mondiâl, ancje chês a sofrissin tant…
__
Isal un moment bon pe lenghe furlane? Ce criticitâts e ce pussibilis alternativis viodial?
A son tantis iniziativis, e chest al è positîf. Che si lavori pe scuele e pe professionalizazion dal insegnament al è une vore impuartant, ma o crôt che la robe plui impuartante e sedi che si mantegni la trasmission dal furlan ai fruts in famee. E chi la situazion, magari cussì, no no mi somee tant positive, ancje se a son iniziativis impuartantis. Il furlan al à di tornâ a jessi lenghe de comunicazion inte famee e inte comunitât dal paîs, che cence di chel il fat che si dopri inte comunicazion uficiâl nol è avonde: e je une robe sì impuartantone, ma che di bessole no lu judarà a salvâsi. ❚

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +