L’omaç internazionâl di Marco Brosolo aes visions di Pasolini

«Al è impuartant cognossi un personaç tant carismatic, tal stes timp autentic, e cuntune culture e inteligjence ecezionâi. Pasolini al podarès jessi di aiût a ducj nô, ancje par miorâ la societât dulà che o vivìn. Soredut in chest moment storic tant critic pe Italie, lei e cjalâ Pasolini al è un regâl pe anime e un at di ben pe comunitât.»
◆ Nuie di miôr di chestis peraulis, par presentâ une opare che e fâs rivivi il “poete de cinise”. Marco Brosolo nus conte dal so gnûf album NUBI. Canto a Pasolini, regjistrât tra Berlin e Udin tal 2022, an che al celebre i 100 agns de nassite di Pier Paolo Pasolini.
◆ Brosolo al jentre te profonditât poetiche dal univiers di Pasolini, e al trasforme in suns i diviers scrits, intervistis televisivis e dialics cjapâts dai siei films dai agns ’60 e ’70.
◆ «Jo o soi furlan, di Banie di Pordenon, un paisut a pôcs chilometris di Cjasarse, dulà che Pasolini al a vivût. In chescj lûcs Pasolini al è simpri presint. Cu la ricercje che o ai fat par creâ NUBI o ai tornât a lei tantis sôs poesiis e une biele part dai siei saçs. O ai tornat a cjalâ i siei film, studiât la sô biografie e mi soi informât su lis vicendis de sô vite e soredut de sô muart. O soi tant grât a Pasolini par ce che al à scrit. I siei films a son ecezionalmentri biei e a rivin a tabaiâmi in maniere intime.»
◆ De ultime volte che o vin intervistât Marco, tal 2015 cuant che al publicà Cadremo Feroci (https://www.lapatriedalfriul.org/marco-brosolo-nus-fevele-di-cadremo-feroci-il-so-ultin-album-su-la-scuvierte-di-federico-tavan/), l’artist al a lavorât a diviers progjets: tal 2016 al à metût in pins il so studi di regjistrazion The Bubble, e tal 2018 e 2019 al à publicât l’EP digjitâl Translitterazioni Focolente, e ancje fondât il doi musicâl Paranoia Godard publicant l’album Concezione. Infin, tal 2021, al à publicât l’album COL MORBO ROSA tant preseât de critiche musicâl taliane.
◆ NUBI, jessût ai 2 di Novembar dal 2022, al è un album intim, malinconic, lizêr e intens. Brosolo al da spazi aes sonoritâts des lenghis, che al scambie naturalmentri, cussì come che al fâs cui diviers struments musicâi che insiemi cu la vôs a crein i “nui” di chest album.
◆ Il titul al ven dal curtmetraç firmât Pasolini “Che cosa sono le nuvole” che si pues viodi tal film “Capriccio all’italiana”. Aculì Totò al recite “Straziante, meravigliosa bellezza del creato”. Marco Brosolo al è partît propit di chest viers, di cheste bielece dal creât: i nûi. E cun chescj al rint omaç a Pasolini, fasintlu rivivi.
◆ Dongje dal piano e de vôs, intarsiant furlan, talian e todesc l’artist al met dongje suns jazz e new wave e al zonte ritmis carateristics dal trip-hop e de musiche eletroniche. Dut racuelt in nûf tocs, un diviers di chel altri.
◆ Nûf tocs, che a son intimis versions di un Pasolini che al cjale i nûi. Di “MATER CASTISSIMA” si passe a “Mi contenti”, “Lamento”, interpretât di Pierpaolo Capovilla, “Wolken” o nûi cjantât par todesc, “Dedica”, “Torna” cul test dal poete e amì Federico Tavan, “In preda al vento” e “Una cosa”, par finî cun “Del loro amore”.
◆ NUBI al è un album internazionâl, no dome parcè che i tocs a son par furlan, talian e todesc, ma ancje pai artiscj che a àn colaborât. In plui dal autôr Marco Brosolo, ae ghitare, vôs e sintetizadôr, si son impegnâts tal album Stefanpaul al pianoforte, Leo Virgili al theremin, bas e trombon, Klaus Martini, Francesco De Luisa al piano e Jacopo Zanette ae batarie.
◆ La cuviertine dal album NUBI e je cjapade di un fotogram di un film di Pasolini. Sul sît di Brosolo http://www.marcobrosolo.net/ si pues cjatâ dute la discografie di chest artist ecletic, insiemi cui leams par comprâ i siei albums, ma ancje videos e fotos de sô art (no si ferme ae musiche). Par savê di plui sul album, cjalâ i videos e stâ daûr al artist, lait su facebook te pagjine di marco.brosolo. ❚