Lis puartadoris (dismenteadis) de Slavie furlane

Al sarà che al è passât avonde timp par che lis cicatrîs te nestre tiere si sedin suiadis, al sarà che la vision dal mont e tache a jessi masse masculine, ma la storie des puartadoris cjargnelis e je simpri plui cognossude e ancje contade ator pal Friûl. Merit soredut dai studis di ricercjadôrs e dal lavôr di volontaris tant che chei de associazion dai Amîs des Alps Cjargnelis, che e à dade vite ancje al museu de Grande vuere di Tamau, che il so simbul al è propit chel di dôs feminis cul zei.
◆ Intai ultins agns, cun di plui, l’interès al è incressût ancje in gracie di rapresentazions teatrâls, romançs e cines, li che no si mancje mai di marcâ il coraç e il valôr di chestis nestris eroinis furlanis.
◆ Come che dispès al sucêt, però, intal rindi onôr e merit si va simpri a risi di dismenteâ cualchidun, forsit no di pueste, ma in chest câs i avigniments dal dopovuere a àn dal sigûr judât a lassâ platadis lis azions di int che e varès meretât di jessi ricuardade, e che invezit a malistent e ven nomenade ancje dai studiôs.
◆ Tal câs des puartadoris, la tindince gjenerâl e je chê di fevelâ dome di chês cjargnelis, cence abadâi masse al fat che dentri di cheste categorie a sedin ancje lis feminis de Val Cjanâl e dal Cjanâl dal Fier. Ancjemò plui delicade e je la cuistion linguistiche, parcè che, aben che dutis a vedin dât il lôr contribût pe cause taliane, no dutis a fevelavin la lenghe dal puest “dulà che al rivoche il sì”. Tantis di lôr, di fat, a jerin fiis di comunitâts dulà che si jere simpri fevelât todesc (la stesse frazion di Tamau, ma ancje Sapade) e duncje cjaladis in stuart, se no ancje tignudis tant che il diaul.
◆ Dongje di chês, a jerin ancje lis puartadoris di lenghe slovene, che a vignivin di Resie, ma soredut des Vals dal Nadison e de Tor. Lis lôr storiis a son inmò in buine part scognossudis, ancje se il lôr jutori al fo fondamentâl pes formazions che a cuvierzevin lis monts de Mont Maiôr al Kolovrat o la val dal Lusinç e dal Judri.
◆ Cemût che nus dîs Giorgio Banchig, president dal Istitût di culture slovene (ISK – Inštitut za slovenko kulturo) di San Pieri al Nadison/Špietar, lis puartadoris de Slavie furlane a forin impegnadis ta chê che e jere la seconde linie dal front, e no ta chê a contat cul nemì, come che al sucedè invezit pes feminis di Cjargne. Chest dut câs nol gjave merit aes lôr azions, che dal râr si cjatin intai tescj.
◆ Intune interviste (jessude intal 1987 intal gjornâl Dom) a une di chês pocjis feminis restadis in vite, la viele, classe 1898, e conte dai prins viaçs, pene sclopade la vuere, di Podresca a Combresca, par puartâur mangjative e munizions ai soldâts partîts pal front. Chescj a forin i prins mês, di Mai a Setembar, po dopo, tacant di Otubar, lis cjaminadis si slungjarin di Clodig a Lenartaj, intal mieç di une tampieste di tons di granadis e di siviladis di palotulis. La zornade e tacave a buinore, prime dal cricâ dì, e si tornave cjase cul scûr, paiadis 10 francs, forsit par ogni viaç, o forsit ogni mês (la paie des puartadoris cjargnelis e jere di 1,50 liris par viaç).
◆ Al è probabil che lis lôr aventuris a sedin restadis platadis parcè che il lôr reclutament nol fo organizât te stesse maniere des puartadoris de Cjargne, che a vevin un librut li che a vignivin segnadis dutis lis consegnis e i viaçs, e che a jerin stadis ancje schedadis. La adesion des feminis de Slavie e fo invezit plui spontanie, cence regjistris o documents, si che duncje, par cirî i lôr nons bisugnarès lâ insot dai archivis militârs, che in dì di vuê a puedin jessi consultâts cence lis dificoltâts dal prin dopovuere.
◆ A Prepot, par dîle juste, intal 2004 al è stât tirât sù un monument cui nons di 23 puartadoris dal paîs, che di Podresca a rivavin fin al front, dongje di Most na Soči (Sante Luzie, in dì di vuê in Slovenie), di li che a tornavin cjamadis di ferîts (e cualchi volte ancje di muarts, come che al sucedè daspò de disfate di Cjaurêt). Chest numar nus fâs pensâ che, ancje se magari no cussì numerosis come chês cjargnelis, a sedin stadis tantis lis feminis a judâ l’esercit talian.
◆ La sperance e je duncje che ricercjadôrs e studiôs a tachin a cirî lis lôr storiis e i lôr nons, di mût che chestis feminis, ancje se a distance di agns, a vegnin premiadis e ricognossudis, cu la stesse dignitât di chês di Cjargne. ❚