Lis evoluzions sul teme dal lat

A un ciert pont al someave che dutis lis stradis, di Udin, a puartassin no a Rome ma… a Bologne. La multiservizis Amga, cedude al Grup Hera (no cence polemichis), e lis Latariis Furlanis – “zoie” in veretât un pôc in decjadence dal compart locâl dal lat e dai siei derivâts – sul binari diret a Granarolo. Al someave aromai dut definît, cul Consei di aministrazion des Latariis sort a ogni clamade. In veretât, ancje la taule di confont proponude dal assessôr regjonâl Sergio Bolzonello par rivâ ae creazion di un pôl unic regjonâl dal dal lat e dai siei derivâts, al jere partît in ritart in maniere colpevule, cuant che aromai la tratative tra il Consorzi di Cjampfuarmit e Granarolo e jere sul finî, e i tecnics dal colòs emilian za di setemanis a studiavin i libris contabii inte sede des Latariis. Cuant che dut al someave aromai decidût, ve la “manifestazion di interès” – ancje cheste ben di là dal timp massim – dal Consorzi Agrari che al à inviât daurman i lavôrs pe elaborazion di un plan industriâl (e di rimunerazion dai arlevadôrs) di someti ai vertiçs des Latariis. L’obietîf de iniziative dal Consorzi agrari – che al à vût za la “benedizion” di Regjon (e des variis fuarcis politichis) e sindicâts – e je chê di valorizâ il progjet di filiere dal lat regjonâl e lis produzions locâls, mantignî lis produzions locâls e difindi i aspiets ocupazionâi complessîfs dal setôr. La pôre e je di fat chel di vê dopo di assisti  – pierdude une realtât tant che Latariis –  a un efiet domino che si abatarès su dut il compart regjonâl, ancje in prospetive de prossime disparizion des cuotis lat e la disponibilitât sucessive di grandis cuantitâts di lat a presits tant contignûts e di varie divignince. Insume, il “made in Friûl” in pericul di disparizion.
No par câs, il progjet di Granarolo al previodeve un dismantelament parziâl dal sît produtîf di Cjampfuarmit e – in bande de cancelazion di une setantine di puescj di lavôr – ancje chê di diviersis produzions. Mandi duncje a mozarelis, jogurt e scuete, inte otiche di une razionalizazion di grup, stant che Granarolo za e je parone, tra l’altri, di marchis tant che Yomo, Pettinicchio e Centrale del latte. A fâ gole ai emilians, in particolâr, lis produzions de Dop Montâs, il plui impuartant valôr zontât di Latariis furlanis. E in mert ai jogurts, e je notizie resinte che Granarolo, in graciis di une colaborazion cul prin produtôr grêc, e impuartarà dal paîs elenic il jogurt grêc, prodot che intal ultin an in Italie al à fat segnâ un salt dal 38,1%. Dal rest, Granarolo, cence fal, intal so operâ e à di lâ daûr aes logjichis tipichis des multinazionâls.
Par Latariis furlanis e pal Pôl unic dal lat e dai siei derivâts, e duncje par une difese de cualitât dai prodots furlans, si vierç invezit une sfese. Al displâs in ogni câs constatâ che masse dispès in Friûl e mancji la capacitât di movisi par timp e cun unitât di impegn te difese des propriis particolaritâts e produzions carateristichis. Masse dispès lis divisions, la incapacitât di olsâ, a àn proddusût za dams ireparabii: dal sisteme bancjari “svendût”, aes mil ocasions pierdudis (uniche multiservizis regjonâl, par esempli). O sperìn di no vê di zontâ ae liste ancje il pôl dal lat e dai siei derivâts. Margjins par un acuardi (ancje cun altris realtâts regjonâls, volint) a ‘nd è. E reste però la amarece di vê di ricognossi che prime di agjî si è lassât che lis Latariis furlanis a rivassin al pic de crisi. E pûr, za inte Sierade dal 2008, cuant che il Consorzi di Cjampfuarmit Latariis al veve deliberât un tai dal presit dal lat conferît (3-4 centesims al litri) ai socis produtôrs par fâ cuadrâ i conts di belanç, chel che al jere il president di Coldiret, Dimitri Zbogar, al domandave une strategjie industriâl e comerciâl, un progjet. Disint: “Al è di agns che si ‘nt fevele. Cumò no puedin jessi plui deroghis. Se a son sacrificis di fâ, a àn di jessi motivâts, no si pues scjariâ dome e in maniere esclusive lis causis su la crisi di marcjât e in definitive sui arlevadôrs”. Cussì al diseve Zbogar. E jere la Sierade dal 2008, cu la grande crisi aes puartis. Di chê volte, di progjets nancje che la ombre. Fintremai cumò. Che il cîl nus judi. ❚
Linux