«Lis conseguenzis dal Deliri» Une declamazion cuintri la ipocrisie dal mont tal gnûf album dai Rive no Tocje

Un disc diret, cence zîr di peraulis. Doi cjantautôrs braurôs di no jessi diplomatics e che a metin la lôr anime tes cjançons. A son i Rive no tocje, la cubie de basse furlane formade dal Citòs e dal Polente, val a dî Fabrizio Citossi e Franco Polentarutti. Culì nus fevelin di lôr e nus presentin il gnûf disc: Lis conseguenzis dal deliri.
«No o sin i Rive no tocje. “Rive no tocje” come chê sensazion di jessi precaris in dut. Te vite e ancje musicalmentri. Si rive no tocje a saltâ fûr».
Dopo di Svuaze, il prin album jessût doi agns fa e dal dut autoprodusût, Citòs e Polente a son tornâts in studi par contânus diviersis storiis dal teritori, in tun costant deliri.
Dut chest mantignint il lôr stîl no convenzionâl, cun sunôrs e visions di ogni sorte.
L’album “Lis conseguenzis dal deliri” al è ancjemò plui speciâl, parcè che al è il disc numar 51 dal catalic di Musiche Furlane Furlane, la etichete discografiche nassude tal 1999 de esperience di Radio Onde Furlane e dal Premi Friûl.
«La nestre e je une storie di blues reâl vivût su la piel. Il disc si ricoleghe ae musiche nassude di un miscliçot jenfri poesie e blues. Chest par dimostrâ che no dome i cuei ma ancje la basse furlane e rint onôr a chest stîl. In plui il Polente al declame lis sôs parts propit come intune poesie di cjamp o di strade. Di culì e dal fat che al è il deliri che nus à puartâts a fâ il prin disc, al è nassût il non dal album “Lis conseguenzis dal deliri”».
Lis cjançons a son 14. Ognidune di chestis e met in evidence i aspiets di ce che al è stât fat a nivel politic e sociâl in ducj chescj agns, e nô cumò o stin paiant lis conseguencis.
Cun blues, divagazions psichedelichis, sgrasais, declamazions poetichis e musiche eletroniche, i tocs a àn dal ironic e sureâl, ancje se clarementri il motîf al è di denunzie.
Denunzie a chês che a son lis imagjinis manipoladis e ribelion ae volontât des istituzions.
I artiscj nus vuelin ancje fa rifleti su chês che a son lis lotis ambientai de Basse Furlane, come chê pes pompis de aghe e nus contin di odi, di ipocrisiis e di vueris che no varessin mai di sucedi.
I titui a son za di lôr rapresentatîfs dai tescj e di ce che a recitin: La multinazionâl, Polente against the machine, Vosadis mistichis, Incuinament mediatic, Vuere Artesiane, Lis brigadis rosè e Colant ju par un gleron a For Davuarti a 17 agns…
«La cjançon che plui nus rapresente e je Manzin stomp, un blues che al ricuarde la figure dal partigjan de basse furlane Gjelindo Citossi. A chest om i mancjave un braç e istès al cjamave la pistole cun tune man sole.
Une figure mitiche che no à ancjemò ricevût la atenzion meretade di bande des istituzions. Polente al à un cuadri di Manzin a cjase: un caratar fuart, che no si pleave denant di nuie. Vuê o varessin di jessi di plui cussì come Manzin. Cun la schene drete.
Claudio Coianiz al à sunat cun no in chest toc cun il so orghin e probabilmentri in curt e deventarà ancje la colone sonore di un film».
I Rive no tocje, dopo la scree e presentazion dal Cd dai 30 di Setembar te cjase di Leon a San Zuan al Natison, a stan za programant un pâr di concierts par coinvolzi ancje lis personis a lotâ a traviers de musiche e de poesie.
Par meti dongje il disc, si son zovâts de colaborazion di amîs musiciscj: Claudio Cojaniz, Jvan Moda, Mauro Raddi e di part dai Trastolons (Fabian Ritz, Guido Carrara, Raffaele BB Lazzara, Lussie di Uanis). Al conte Citòs: «Podê colaborâ cun i Trastolons al è stât un grant onôr e ancje un omaç e un ricuart dal poete trastolon Raffaele BB Lazzara, che nus à lassât cualchi mês fa, un grant artist, che simpri al inovave. Tal disc al è un toc cjantât propit di Raffaele (Polente against the Machine)».
Par savê di plui sul Citòs e Polente e i lôr progjets, ju cjatais sul web. ❚
✒ Moira Pezzetta