✒ Dree Valcic
✽✽ Presentant il prin numar di chest an de Patrie, in Fevrâr, o vin ricuardât cuntun minût di cidinôr Giulio Regeni.
✽✽ Une emozion fuarte intune sale plene par saludâ chest sfuei che al vûl jessi une risultive continue di ricercje de veretât. Chê che e mancje ancjemò, a distance aromai di masse mês, su la fin tragjiche di chest fi dal Friûl. Un dai tancj nestris zovins sburtât a lâ vie de voie di cognossi il mont, cence par chest dismenteâ lis sôs lidrîs. Altris a son obleâts a cheste sielte par cirî chel lavôr che vuê no cjatin plui chenti.
✽✽ Nô o sin chei che a van indevant a domandâ «Veretât par Giulio Regeni» pûr savint che chest Stât, cheste Italie, che no à savût dâ non e musis ciertis a nissun dai siei maçalizis, a nissune des sôs tramis scuris, nol tornarà fûr nancje cheste volte a fâ il so dovê.
✽✽ Nô furlans o savìn ben cemût che al sepi dî bausiis, scuindi dut ce che no si conforme ae sô, di veretât. Al scriveve pre Beline inte prefazion ae Cuintristorie dal Friûl di pre Bepo Marchet e pre Checo Placerean: «il contrari de veretât e je la bausie; il contrari de storie a a son lis storiis, lis flabis, lis contis, lis bufalis, lis pantianis che si contin par indurmidî la int, di mût che no rivi a viodi la realtat nude e crude e par fâle cjapâ la plee che si à destinât e doprâle come che si vûl…»
✽✽ Cirî, batisi duncje pe veretât e vûl dî tornâ a afermâ il propri dirit a jessi protagoniscj de storie, a no contentâsi, o piês, a no supâ mai chel che la propagande dai sorestans e vûl fânus crodi.
✽✽ Chest concet al vâl par ducj i setôrs de vite publiche: da la economie ae culture, da la scuele ae sanitât, dal ambient ae urbanistiche, ma soredut al devente fondamentâl pe politiche, parcè che mai tant che vuê, si è assistût a une progressîf anulament de stesse idee di popul furlan tant che realtât coletive, determinade in sens storic suntun determinât teritori.
✽✽ Lis bausiis sul Risorgimento, su lis vueris, sui dirits dineâts, a son la cuviertidure ideologjiche a chest procès di nichiliment.
La veretât duncje nol je dome rivoluzionarie, ma al è il strument che nus permet di mandâ indaûr chest assalt stomeôs e turbit. ❚
