EDITORIÂL – La brute fin de Cjadree Grande

Si dîs che a Shangai e sedi la plui grande concentrazion di Ferrari…
No tancj agns za fa, lis Ferrari e lis Maserati a flocavin a Manzan. Se tu vevis une machine di mancul di 3.000 di cilindrade tu jeris un puar basoâl.
_Ma prime che e rivàs la grande crisi che e à metût in zenoglon dut il mont, la cjadree di Manzan e veve za scomençât a scloteâ. Ogni an, tal mês di Setembar, si contave trops che no tornavin a vierzi lis fabrichis dopo des feriis.
_Se o podìn vê braùre di jessi “salts, onescj e lavoradôrs”, o vin ancje di ameti di no jessi masse imprenditôrs. Bêçs ingrumâts dai nonos e dai paris tai agns bogns a son stâts crustâts in cuatri e cuatri vot dai nevôts che si son cjatâts la fabricute tal curtîl e a àn crodût che e podès lâ indenant di bessole, cence fadie e cence scuele. I cjadreârs a àn tirât dilunc par agns disint: “cumbinìn” o “o vin fat simpri cussì”.
_Dopo, e je rivade la globalizazion mondiâl, ma ancje chê di une Europe metude adun cul spudicj, dulà che un operari polac al cjape 5 voltis mancul di chel furlan, ma al fâs il stes lavôr e al prodûs lis stessis robis. Duncje no je dute colpe dai imprenditôrs de zone, ma di sigûr nol à judât il fat che chei che a vevin un francut a sedin lats a metilu propit là, puartant machinaris, tecnologjie e know how.
Chei che a àn vût, forsit, plui cûl che sintiment a àn ancje fat i bêçs, ta chei agns. Chei che non àn vût ni cûl ni sintiment, ju àn rimetûts.
_No son ducj cussì, si capìs. Ancje te zone dal Triangul si cjatin aziendis che a àn une lôr personalitât e che a àn fat e a fasin un bon lavôr, ce discors! Ma al è come dî che no ducj chei che a son dentri in vie Spalato e son delincuents. Vere, ma chei onescj no fasin grum!
_20 agns a cori daûr a chei che a vendin di plui parcè che a fasin presits plui bas a àn segnât un agâr che al sarà dûr di stropâ. Intun mont “2.0” la teorie che “la pratiche e vâl plui de gramatiche” e larès un tic riviodude, parcè che in Australie, se a àn voie di spindi pôc, a san dulà lâ.
_Se a rivin fintremai culì al è parcè che a cirin cualitât, inovazion, studiis di marcjât, professionalitât e aziendis prontis a metisi in discussion, no par comprâ cjadreis che a costin mancul di un pâr di mudantis!
_La Grande Sedia dal Guinnes dai primâts e cole a tocs: une volte il simbul di trop che al jere grant Manzan, cumò il spieli di un Triangolo della Sedia che al fas pôre plui di chel des Bermuda. ❚
✒ Radeschi