(L)INT FURLANE. Furlans e Stât talian

✽✽ O scugnìn simpri visâsi une definizion preziose che cun chê Sergio Salvi al à judât ducj a fâ clarece su cui e ce che o sin a pet dal stât talian: o sin citadins talians di nazionalitât furlane. Cussì a varessin di stâ lis robis dal pont di viste istituzionâl, ancje se la seconde part de asserzion no ven ciert rispietade de Republiche.
✽✽ Chest nol gjave che a cheste o vin di fâ riferiment cuant che in bal a son cuistions che a rivuardin l’asset gjenerâl dal Stât e soredut la cjarte princip dai dirits e dai dovês, ven a stâi la Costituzion.
✽✽ Un just svicinament al referendum pe sô revision, che si tignarà in Otubar, secont me al à propit di partî dal fâ proprie – in dutis lis sedis, ma ancje intal nestri mût di resonâ, di metisi devant de cuistion – la afermazion di Salvi.
✽✽ Cuntune premesse necessarie: cheste e je buine se ducj i doi i tiermins de definizion a vegnin rispietâts. Al vâl a dî: mi ricognòs citadin talian inte misure là che o ven ricognossût tant che furlan. Se al salte chest “acuardi”, al salte ancje il binomi istituzionâl.
✽✽ Ce compuartial inte disposizion politiche di assumi sul referendum volût dal guvier Renzi?
Il prin efiet al consist intal no fâsi strissinâ de logjiche dai partîts talians, ducj a pro o cuintri dome par mantignî il lôr podê, indebilî l’aversari, creâ gnovis clientelis.
✽✽ Il secont al permet di no colâ inte ideologjie des formazions. Il tierç al permet di podê cjalâ aes riformis costituzionâls partint dai interès dal Friûl e de sô int.
✽✽ Si trate di meti devant dai nestris voi cuâi spazis che e consintive la Costituzion in vore pe nestre specialitât, pe cressite pussibile de autonomie, pe nestre nazionalitât, e ce che e previôt invezit chê “revisionade” dal parlament di cumò.
✽✽ E je in fonts une sielte facile, di là apont dai schemis dai partîts e dai moviments talians: cui che nus vûl ancjemò “sclâfs di Rome” o cui che al acete la nestre diversitât. ❚
✒ Dree Valcic