LInt AUTONOMISTE. Simpri plui Friulgiuliesi

Mi soi cjatât intal licôf de Ikea a Vilès. No starai a contâus dal gjenar di publicitât e de presentazion dal grup comerciâl, ma dai discors che a son stâts fats pe ocasion cualchi element di analisi al pues pardabon vignî fûr.
Duncje, il president di Ikea Italia, tai motîfs de sielte dal lûc dal gnûf centri, cun intenzion e cun fuarce al à volût meti chês carateristichis che ator pal mont a segnin i furlans e il Friûl. A son simpri lis solitis, leadis al lavôr, ae serietât, ae fiducie che o vin semenât tai paîs forescj.
La solite muse che cualchi volte nus va ancje strete, ma cuant che a son chei altris a nomenâle, nus fâs plasê.
I rispuint Ciriani, vicepresident de Regjon, che subite al precise che no si trate di fevelâ ben dome dai furlans, ma ancje dai venits e dai julians.
O varès capît se al ves dite slovens e todesc, par fâ riferiment a chei altri grups linguistics sul teritori, ma sincerementri nol centrave nuie cu la Ikea, a mancul di no pensâ a un messaç comerciâl cun Slovenie e Austrie.
O soi sigûr invezit che daûr chê frase a jerin scuindûts doi pensîrs: il prin clarementri eletorâl, viodût che Ciriani al è di Pordenon e la sgubie dal Pdl dal Nonciel su la presince venete te Diestre Tiliment e è un lôr balin fis. Sul stes plan, la cuistion dai julians: Vilès provincie di Gurize, e duncje Venezia Giulia. La seconde e je aromai tal dna dai nestris  sorestants: mai fâ passâ la idee, il concet di un «unicum», cuant che si cjacare di Friûl.
Se po dopo la ocasion par chestis declarazions e je publiche, miôr ancjemò.
Dut chest al sarès ridicul, se nol ves invezit rivât a produsi dams une vore impuartants.
Cjalait la comunicazion e cemût che a vegnin aromai dopradis lis peraulis. Nol esist plui il vin, o il formadi furlan. Si bêf e si mangje un prodot dal Friuli Venezia Giulia. Une volte i ai domandât a Riccardo Illy, rispiet ae sô idee di Regjon, cemût che si saressin nomenâts i abitants di culì: «Friulgiuliesi», mi veve rispuindût. I vevi dite che al sunave tant mâl.
Illy no è plui, ma chei che a son rivâts dopo,  a son ancjemò piês.
Dree Valcic