✽✽ Al è un virus pericolôs ator pe Europe, ancjetant mortâl dal Covid 19, che al colpìs la essence stesse dal pinsîr europeist, o almancul chel che, tant che autonomiscj, o fasìn riferiment: une union di popui e no di stâts. Concet che in bocje ai catalans, ai bascs, ai scozês, ai furlans, ai sarts, in sumis a ducj chei popui che a componin la grande famee des minorancis nazionâls, al sune tant che volontât assolude di partecipâ ae costruzion di une realtât democratiche, fondade sul rispiet des diversitâts e su la volontât di progrès de popolazions, in non de solidarietât e dal ben comun.
✽✽ Bielis peraulis, a disaran in tancj, ma la realtât dopo e je ben divierse, cemût che o vin podût verificâ inte stesse emergjence sanitarie dulà che par un pieç a àn comandât i egoisims des singulis capitâls e dulà che a dut vuê a restin compuartaments che no àn nuie a ce fâ cul spirt di aiût mutuâl.
✽✽ Atenzion però ce ancje altris a doprin il tiermin “Europe dai popui” par increditâsi tant che difensôrs dai interès popolârs cuintri des oligarchiis dai governants, dal strapodê des bancjis e de finance, ancje se dopo, une volte lâts al podê, si compuartin tant che chei che prime a contrastavin. Dispès piês, par ce che al tocje il rispiet des regulis de democrazie stesse. Al è just definîju sovraniscj no parcè che si pandin tant che difensôrs dal popul sovran, ma parcè che si compuartin tant che regnants assolutiscj e cuintri di lôr e vâl dome che la leç de Bastilie.
✽✽ Che dopo, specie chei nostrans, ae prove dai fats a son ancje cunins. Cjapait par esempli in Regjon il president Fedriga. Di là di berghelâ cuintri il guvier, ma dome cumò che la Leghe lu à pierdût pes cjastronadis di Salvini, al sta ben atent a no meti in vore ats concrets che a puedin meti in moviment la autonomie regjonâl.
✽✽ Stant che al è aromai un politicant consumât al sa che, se al volès, cu la maiorance che si cjate fûr a Triest, al sarès in stât di movisi in maniere contrarie a Rome in tancj setôrs, chei che za il nestri statût di specialitât al previôt e al permet. In cualchi câs si larès al scuintri cul Stât, finalmentri la Comission paritetiche e podarès discuti su lis sieltis e no poltronâ beade in cualchi palaç trasteverin. Cussì si môf un partît, un leader che al crôt pardabon ae autonomie de sô tiere.
✽✽ Ma, just, di ce tiere fevelìno al veronês Fedriga, tant plui sensibil al incjant dal coregjonâl Zaia che al riclam di Toni di Cerneglons o di Marie di Vasinis? Ce nons barbars!
✽✽ E dopo, met il câs che la diestre e torni al comant, no varà mighe di lassâ une patate bolinte tra lis mans di un guvier amì! E se po al fasès ancje lui part di chel stes, cemût salvâ il lat e la cite? Miôr duncje zigâ “autonomie”, e pandisi tant che paladin di chê, ma intant continuâ a movisi fasint i interès des grandis aziendis, des confraternitis de energjie, de italianitât e dai sacris confins; tante retoriche e sieltis che no fasin ciert i interès de Regjon, e soredut no dal Friûl.
Dut câs, al è in buine compagnie: ae classe dirigjente furlane i va ben un om bessôl al comant, al baste che nol comandi e che nol ledi cuintri i siei interès di buteghe.
Basse manoalance, altri che autonomie. ❚
Dree Valcic