✽✽ Un dai periodis plui biei de mê vite al è stât chel dai agns passâts cui scouts. O soi convint che buine part de mê educazion, dai miei valôrs, a rivin di chê monture metude sù prime di fantaçut e po dopo di zovin. Intun dai miei scansei o conservi in maniere zelose lis mostrinis zalis de mê prime scuadrilie, lis panteris, il ferme façoleton e la acuile ricamade di Beltram, che e vignive cuside su la manie diestre sot dal non dal repart di apartignince.
✽✽ Une diretive resinte de Agesci regjonâl e invide i grups a meti tal puest de acuile patriarchine la “gjaline regjonâl”, intai cjamps estîfs de associazion. Che e svintuli duncje une bandiere inventade de politiche e no plui une tele che e cjape dentri secui di storie. La sielte e ven justificade tant che “un at formâl dovût”. Scuse ridicule, come se la bandiere dal Friûl e ves di domandâ il permès di jessi esponude. O speri propit intun at di braùre dal mont scoutistic furlan: la sô lungje tradizion no pues patî un afront simil che al sune ancje tant che ofese ai principis di democrazie e di solidarietât dal moviment.
✽✽ Un episodi isolât? Propit no. In sieradure dal cors di lenghe e culture furlane di une scuele elementâr, tra i dissens di fin dal an, al comparìs chel di un pipin che al strenç in man une bandiere cu la acuile de Regjon e sot de scrite Friûl. Il piçul autôr nol à nissune colpe, ma di cui ise rivade cheste impostazion?
✽✽ Cjalait, e pâr une bataie di retrovuardie, di solits vecjos fissâts, ma se o dais une voglade ator, si inacuarzarês che, massime su lis sedis di ents e aministrazions, dulà che prime e vignive esponude la nestre acuile, cumò al cjate puest un rapaç orent che al gafe une citât, o ben Rome che e comande su Aquilee, intun stîl di timbri di ufici.
✽✽ Câs? No, operazions di regjim simpri plui insuridis e provocatoriis in non di un FVJ simpri plui bol comerciâl e simpri mancul Friûl. ❚
