Limits di 100 km/h su lis autostradis de Carinzie

La Aministrazion regjonâl pe tutele dal ambient de Carinzie e à dit che, par un vêr mudament su la cuistion de energjie, bisugne indreçâsi prin di dut sul sparagn energjetic. Daûr dal “Dossier sparagn energjie” si varès la pussibilitât potenziâl di sparagnâ il 45% cence pierdite di benstâ di bande dai citadins.
◆ Prime di dut i sorestants dal ambient a consein di ridusi la velocitât dal trafic des machinis. Za cussì al somee che si puedi vê un sparagn energjetic teoric dal 66%. La propueste no je gran di sotvalutâ, ancje par vie dai auments vivarôs dal cost dai carburants. Daûr di ce che o vin dit, la Aministrazion regjonâl pe tutele dal ambient de Carinzie e à domandât al ministri federâl di competence Leonore Gewessler (Verts) di cjapâ subit la decision di ridusi la velocitât massime su lis autostradis e su lis tradis statâls gratuitis: 100 km/h su lis primis, 80 km/h su lis secondis. Ma il ministeri al à dât une rispueste cence vincul: “Chel che ae vuide dal so mieç al ridûs la velocitât, al sparagne energjie e al rispiete l’ambient. Cun di plui al sparagne ancje bêçs. Chest contribût al è a la puartade di ducj e ducj a puedin za dâlu”. Si che duncje il ministeri nol cjape in considerazion pal moment di ridusi i limits di velocitât.
◆ Ma la Aministrazion che o vin dit e pense che pe tutele dal ambient si vedi di lâ propit par cheste strade: cun di fat la Austrie, dutun cu la Gjermanie, e je l’unic stât là che su lis stradis statâls si pues cori a 100 km/h, stant che in ducj chei altris il limit al è di 80 o 90 km/h. Stant ae Aministrazion regjonâl pe tutele dal ambient, su lis autostradis si varès di cori a no plui di 100 km/h par vie che cussì si varès un grues sparagn intal consum di carburant e intes emissions di CO2 (23% di mancul), la metât des emission di ossit di azot e la riduzion di un tierç di polvars sutîi. ❚