“Lu clamavin fuart ‘pre Artistico’, par che nus berlàs, fasint fente di corinus daûr o di meti man ae sô arme miôr: il fier pleât che al veve sot de gabane e che al doprave par solit par stiçâ lis boris dal turibul sgurlant tor ator dal fornel. ‘Aristico, mi clami pre Aristico, ma al è miôr se mi clamais pre Pitin’.”
Za di chestis primis peraulis de presentazion (scrite di Zuan Carli Tonutti, za sindic di Codroip) si capìs ce sorte di om che al è chel che di lui si fevele in chest libri, che al à vût vint il premi san Simon intal 1981 (e jere la seconde edizion).
Cemût che al spieghe Robert Bertòs, inte jentrade, al è stât l’unic câs di un vincidôr che nol è stât publicât par cure dal Comun (cheste edizion e je une ristampe par cure di Glesie Furlane, tai 25 agns de muart di pre Pitin). Parcè? Mah! Dal sigûr il ritrat che al ven fûr nol è fat par edificâ i letôrs. A fasin une magre figure un pôc ducj: la istituzion glesie in primis, cu la sô jerarchie seneose di fâ cariere o, adiriture, di meti vie bêçs, plui che no avodade ae salût des animis. I predis stes che si fasin dispiets un cul altri piês che no i fruts. La biade int che e porcone a rote di cuel, tant di fâ sclopâ di aviliment i plevans.
Insome, un panorame desolant. Che, magari cussì no, al finìs par cjapâ dentri ancje il protagonist dal libri, pre Pitin, un bonat di predi, sclet, bon, sincîr e cence braùris, ma che, in fin dai fats, al mostre plui i siei difiets (massime chel di alçâ il comedon) che lis sôs cualitâts. Cualchi volte al ven propit antipatic: ce bisugne vevial di berlâ in sagristie che la nuvice e jere plene (p. 60)? O di fevelâ tant mâl dal so plevan (p. 69)? O di imbusâsi inte ostarie a bagnâ la peraule fin a dismenteâ che i competeve di tignî sù rosari (p. 38)? E po, la piês di dutis: al zuie di balon cu la mularie, ma al pretint di vinci simpri lui (p. 57)!
Se l’intindiment dal libri al jere un ricognossiment par chest predi che al à onorade la glesie e nudride la int, si à la impression che nol vedi centrât dal dut il so obietîf. Al reste, però, un biel esempli de magnifiche prose di Beline: no par nuie, l’autôr che plui al à scrit in furlan. Di segnalâ ancje i biei dissens di Zuan Di Lena, che a insiorin la publicazion. ❚
