AA.VV. Senegjaturis. Cinc voris premiadis ae I e II edizion dal concors par senegjaturis in lenghe furlane, Udin, 2000

“La domenie buinore di trê personis che no varessin mai volût cjatâsi. Un al è un solitari che al vîf intune sorte di tane metropolitane, salvadi e dispetôs te sô ande ecessive, cuant che si presente la ocasion. Chei altris (che a rapresentin la ocasion) a son doi predicjadôrs puarte a puarte, cjapâts intun tramai produsût des stessis circostancis implicitis tal lôr lavôr fat di ustinazion, di peraulis e convinzions.”
◆ CunCun chest preambul e scomence L’aiarin di Avrîl di Giorgio Cantoni, la prime di chestis cinc senegjaturis metudis adun intun libri di cent e cuarante pagjinis, testemoneance de vivarositât de culture furlane. Cantoni al zuie suntun ‘crescendo’ dal personaç principâl che al corispuint a un ‘diminuendo’ dai doi antagoniscj.
◆ In Parcè mi âstu fermât mame, Massimo Garlatti Costa al conte di un frut salvât des aghis (tant che Mosè?) che nol rive mai a integrâsi intal mont dulà che i tocje di vivi. Teme ideâl par un curt metraç che al somee di viodilu za realizât biel leìnt la senegjature. No par nuie l’autôr al è un regjist.
◆ Franca Mainardis e so fi Nazareno Petris, in Il svindic dal timp, a visitin il classic câs di un che, dut intun colp, si cjate strabalçât intune ete che no je la sô. Robis che a puedin sucedi un trê di Avrîl in Friûl!
◆ Plui consistente la vore di Lauro Pittino, Gnot a Patoc, un paîs di mont  imagjinari ma ben plantât inte realtât furlane. Al à dome un abitant fis, ma chest no lu salve dal cognossi bruts trafics e fintremai un sassinament, intune trame che si colore un pôc di zâl. O sin ben lontans dal Friûl fat di un popul salt, onest e lavoradôr: dut il mont al è paîs e lis robis brutis no sucedin dome  inaltrò!
◆ La ultime senegjature e je di Gianni Gregoricchio, pene impuartante de lenghe furlane. Se finirà la gnot e conte di un amôr impussibil no par motîfs ni economics ni raziâls ni sociâi. Lei par capî. Al basti dit che l’autôr al fronte un teme no facil e che, fin a îr l’altri, al jere tabù. E lu fâs cun delicatece e cun analisi psicologjiche atente.
◆ Al sarès biel podê judicâ la cualitât des voris viodintlis metudis in sene. Ma za lis scrituris a mostrin la capacitât di doprâ lis tecnichis di un lengaç gnûf pe culture furlane, tant che chel dal cine. ❚