ART TAL TAC. DrumlandUo: tiere e aghe, cîl e aiar

La sperimentazion di suns
tai monts de musiche jazz,
etniche e contemporanie
«Doi zovins cui pîts plantâts te campagne furlane e il cerviel proietât tal iperspazi.
◆ Doi dai rapresentants cun plui sgrimie de gnove gjenerazion jazz e estemporanie de nestre tiere.» Cussì Radio Onde Furlane e descrîf Laura Giavon e Marco D’Orlando, che tal Lui dal 2020 a àn metût adun i lôr talents artistics par dâ vite al progjet DrumlandUo.
◆ Doi zovins artiscj che in chescj agns si son za esibîts sui palcs dai concierts e dai festival principâi tant che Suns Europe 2020 e 2021,  Carniarmonie, Aeson, Trentino jazz, Musica in villa e tancj altris.
◆ DrumlandUo al e un progjet nassût come une estension dal album “Bite”, realizât di Marco come solist, cul obietîf di descrivi in musiche la campagne de basse furlane, cun lis sôs grandis largjuris di cjamps, arbui e cîi improbabii, ma ancje de monte, cui siei suns.
◆ Lis lôr melodiis a cjapin ispirazion dal paisaç, dal primitîf dulà che l’element acustic al è il plui basilâr pussibil: vôs e baterie, melodie e ritmi, cîl e aiar, tiere e aghe.
◆ Cul passâ dal timp ancje la campagne si trasforme e cussì la melodie e devente un messedâsi di suns, simpri plui complès, che a rapresentin l’evolvisi des tradizions e la transizion tecnologjiche.
◆ Cun chest lôr progjet a mostrin cemût che la tradizion popolâr si rivi a miscliçâ cence nissune pôre. I doi artiscj a san sperimentâ cun cjâf e ironie, zontant tai lôr tocs simpri plui struments musicâi.
◆ Laura Giavon che e da la sô vôs, lis percussions e il synth ta chest progjet, e je une cjantante furlane che e à studiât in Italie, Austrie, Olande e Zimbawe. In plui che cun DrumlandUo e je ative ancje cul cuintet Rivocs e e colabore cun diviers diretôrs, tant che esecutore di musiche antighe.
◆ Marco D’Orlando ae batarie, bas eletric e percussions al studie tal dipartiment jazz dal Conservatori di Udin e tai agns al à frecuentât i artiscj plui innomenâts de sene dal jazz taliane e internazionâl. Cumò al lavore cun diviersis grups, che a esplorin varis gjenars e lenghis: Maistah Aphrica, Opacipapa, North East Ska Jazz Orchestra, Fainas. Tal 2017 al costituît il so prin progjet Drumlando e tal 2020 cun Laura i DrumlandUo.
◆ I doi zovins artiscj, sperimentadôrs feroçs de musiche jazz, contemporanie e etniche a colaborin cun formazions, artiscj, orchestris, balarins e musiciscj preseâts in Italie e tal mont. Par scuvierzi di plui sul progjet e par savê cuant che o podês lâ a scoltâ DrumlandUo, stait daûr ae pagjine Facebook di Marco e al so blog https://marcodorlando.wordpress.com/ ❚