Lenghis e dirits, ELEN e fâs indenant lis sôs propuestis ae Conference sul avignî de Europe

Vot propuestis par che e sedi une Europe «plui Europe», plui rispietose dal pluralisim linguistic e dai dirits e plui «unide inte diversitât». A son chês che a son stadis fatis indenant de Rêt Europeane pe Paritât des Lenghis (ELEN – European Language Equality Network) par che a vegnin cjapadis sù inte suaze de Conference sul avignî de Europe.
◆ Joibe ai 17 di Fevrâr stâts, Davyth Hicks – il segretari gjenerâl de rêt che e ten dongje 166 entitâts associativis e organizazions che a son espression di cuarantesîs comunitâts linguistichis e nazionâls minorizadis presintis in vincjetrê stâts dal continent – al à presentât lis sôs racomandazions ai eurodeputâts che a fasin part dal Intergrup des Minorancis linguistichis e nazionâls, la agregazion trasversâl là che si dan dongje i components dai diviers grups politics dal Parlament European (PE) che a fasin part des comunitâts di minorance o che a son atents aes lôr rivendicazions di ricognossiment e di tutele.
◆ Hicks al à sclarît lis diviersis resons che a àn sburtât ELEN a decidi di rispuindi in maniere ative e propositive al invît che la Union Europeane (UE) e à fat ai citadins dai siei stâts membris, cu la Conference sul avignî de Europe, inviade ai 9 di Mai dal an passât cun chê di tirâ dongje stimui, propuestis e indicazions (midiant de plateforme in linie https://futureu.europa.eu/) par potenziâ e par disvilupâ la unitât politiche dal continent e il so profîl democratic, tacant dal fat che «e va dilunc la impunitât dai stâts che a son protagoniscj di formis diferentis di discriminazion cuintri des lenghis minorizadis e dai dirits linguistics».
◆ «Magari cussì no – al à zontât – la UE e mostre di no jessi in stât di intervignî in maniere positive in chest cjamp, cemût che al è saltât fûr a clâr cu la sielte de Comission Europeane (CE), juste un an indaûr, di no calcolâ la iniziative dai citadins Minority Safepack. Nol è pussibil che la UE no vedi lis competencis che a conventin par condizionâ in maniere positive la azion dai siei stâts membris in cont di lenghis, minorancis e dirits linguistics».
◆ Par chel ELEN e à cjamât sù su la plataforme de Conference sul avignî de Europe lis sôs racomandazions, che a proponin un regolament de UE pes lenghis in pericul di estinzion, un pai dirits linguistics di minorance e un pe paritât digjitâl des lenghis, la creazion di un comissari european o di un difensôr civic cun competencis specifichis tal cjamp dal ûs des lenghis e de promozion e dal rispiet de diversitât linguistiche e il slargjament de puartade dal articul 19 dal Tratât sul funzionament de UE par che al cuvierzi ancje la discriminazion fondade su la lenghe e su la apartignince a une minorance nazionâl. Chês altris propuestis a tocjin la pussibilitât di inviâ proceduris di infrazion pe discriminazion cuntri des lenghis minorizadis, il finanziament diret de UE pai progjets des comunitâts di lenghe minorizade e la metude adun di un plan de UE pe garanzie dai dirits linguistics che al ledi daûr dai contignûts dal Protocol di Donostia, prontât ancjemò tal 2016.
In chê stesse sentade a son stadis presentadis ai euroedeputâts dal Intergrup ancje lis propuestis fatis indenant dal NPLD e de FUEN. ❚