Vuê, cu la nomine dal gnûf Consei di Aministrazion e dal gnûf President, e cu la prossime rinovazion di chei altris orghins statutaris (Comitât Tecnic Sientific e Coleç dai Revisôrs dai Conts), la ARLeF si invie a inaugurâ un gnûf cicli che al previôt un impegn futûr di ben 5 agns.
Une prospetive impuartante che e compuartarà decisions programatichis fondamentâls, di lungje durade e di grande responsabilitât.
In linie cun ce che al è za stât realizât tai agns passâts, si varà duncje di continuâ a lavorâ sul corpus de lenghe, lant indenant cu la elaborazion e la metude in vore di une politiche linguistiche che e à di rivâ a une dotazion lessicâl normalizade in stât di rispuindi a ogni situazion comunicative.
Par ce che al rivuarde po il status de lenghe, l’impegn al varà di sei indreçât a fâle sintî tant che un valôr zontât, sei dentri che fûr de comunitât linguistiche, cuntune azion costante di promozion direte, cun siei progjets, ma ancje in sinergjie cui sogjets publics e privâts dal teritori di riferiment.
La Agjenzie e varà di impegnâsi a disvilupâ il confront cu lis molteplicis realtâts, publichis e privadis, che a lavorin a pro de lenghe furlane in maniere che la impostazion e sedi sodisfasint par ducj e e permeti la aplicazion de leç a un livel condividût.
Po dopo, in chest moment storic particolâr, o volarès marcâ la impuartance di une azion che e slargji il cjapâ cussience, di bande dai furlans, dal significât e dal valôr vêr de politiche linguistiche regjonâl tai confronts de lenghe furlane.
Cualchi dubi e ciertis perplessitâts che si sintin ator e che si lein su la stampe locâl a àn di sei distrigadis e superadis cuntune opare di persuasion culturâl convinte e professionalmentri serie.
Dal sigûr i problemis no mancjin.
Un plan seri di politiche linguistiche, dongje de individuazion dai obietîfs e des strategjiis, al à ancje bisugne de garanzie di podê contâ su di un budget di spese adeguât.
Chest aspiet ultin al risulte condizionant, propi tal merit des sieltis pussibilis rivuart ai obietîfs e aes azions individuadis.
Inmò e reste in pîts, tant che une spade di Damocle, la impugnazion dal Guvier centrâl de Leç Regjonâl n. 29, vicende che e condizione no pôc une buine e impuartante part dal lavôr.
Un compit une vore significatîf e strategjic, te suaze de politiche linguistiche dal furlan, di competence de ARLeF e ripuartât a clâr tal so statût, al è chel di «favorî la colaborazion plui largje jenfri i organisims publics e privâts che a lavorin pe cognossince, pe difusion e pal ûs de lenghe furlane tant che une sede permanente di coordenament gjenerâl e di verifiche des liniis di indreçament e des iniziativis realizadis di ents e istituzions».
Te sô ativitât e te sô programazion, la ARLeF e varà simpri di plui di rapuartâsi cu lis esperiencis produsudis di chês altris comunitâts europeanis dulà che si fevelin lenghis minoritariis e in chê direzion promovi colaborazions concretis cu lis istituzions e lis associazions che a lavorin in chest setôr.
Dut chest ancje cul fin di dâi ae opinion publiche regjonâl, e soredut ai zovins, une moderne e plui juste imagjin de cuestion furlane, cussì di risultâ stimolant e interessant no dome dal pont di viste esclusivementri linguistic e culturâl, ma ancje dal pont di viste socio-relazionâl e parfin economic-ocupazionâl.
Pai prossims agns, duncje, il compit de ARLeF al sarà chel di ponisi tant che principâl pont di riferiment istituzionâl par cui che, public o privât, al à chê di lavorâ cu la finalitât di dâi gnûf valôr e vigôr ae nestre lenghe furlane, acetant di bon grât lis sfidis dal doman.
Lorenzo Zanon
President de ARLeF
Stin dongje ae Patrie
Redazion
La seconde edizion de manifestazion “Stin dongje ae Patrie” e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte serade, che e sarà presentade dal diretôr Walter Tomada e di Serena Fogolini, si daran la volte musiciscj, […] lei di plui +
Pirulis di musiche e di storie / Un pitôr musicâl di San Denêl tal inovâl de sô muart: Giulio Urbanis (1540 – 1613)
Alessio Screm
Stant che tal articul chi sore o ai scrit di iconografie musicâl, la pirule di storie e di musiche di chest mês si intive a celebrâ un pitôr furlan che al à dât cetant in fat musiche piturade, e di lui si celebrin chest an i cuatricent e dîs agns de sô nassite. Lui al […] lei di plui +
Il cjastelîr plui grant di simpri / Sot des pleis de tiere: ae scuvierte de origjin dal çuc di Udin
Serena Fogolini
Daûr di une liende, di un proverbi o di une conte popolâr si plate simpri une fonde di veretât Al sarà forsit par cheste reson che cualchi mês indaûr, jessude la gnove di studis sientifics che a dimostravin la artificialitât dal çuc di Udin, nissun di noaltris si è maraveât plui di tant. Dal rest, […] lei di plui +
Lenghe / A Cormons si fevele dal furlan te informazion
Dree Valcic
L’impuartance dai mieç di comunicazion par la difusion de lenghis minoritariis. Cun Emanuele Galloni, Guido Germano Pettarin, Andrea Valcic. Al à moderat Wiliam Cisilino. lei di plui +
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +