L’EDITORIÂL. Vierzìn i barcons a la Primevere furlane

Primevere e je forsit une des peraulis plui dopradis tes poesiis furlanis, e no dome. Si viôt che i sintiments plui lizêrs dal om a sintin alc che al cambie tal aiar, la gnove vite che e sburte lis plantis, i fantacins e lis fantacinis a cirî amôr. Tropis voltis doprìno chescj vocabui tal timp di vuê? Pocjis di sigûr, parcè che nus dan cuasi la impression che no corispuindin plui ae realtât dure, tichignose di ogni dì, di ogni zornade passade plui a campâle che no a gjoldi de nature dulintor.
O vin cuasi pôre di doprâlis, par no colâ te retoriche di une Arcadie furlane che e puarte daûr di se il concet de «isule felice» che nus à freâts par tant timp.
Ma provìn invezit a crodi par un moment che la freolade e jere dome tal cjâf di chei sorestants che,  cun chê scuse, ti taponavin i voi, ti presentavin un Friûl che al esisteve dome tes cartulinis.
Pensìn ancjemò par un moment che chê «isule felice» e podarès jessi une altre robe, une situazion no di comedie e di bausiis, ma invezit un alc creât dai furlans, no dome par lôr, ma tant che esempli ancje par chei altris.
La Italie no nus cjapie simpri «di esempli»? Combatents eroics sul front de prime vuere, lavoradôrs che si spachin la schene, feminis che par dâ di tete ai fîs dai milanês e dai torinês no ‘nd jere di miôr. E po dopo, emigrants che a tignivin alt l’onôr dal paîs, int che e paie lis tassis, che no bruntule mai. Anzit, ti rispuint cun «Comandi!», nancje che o fossin ducj nassûts intune caserme. L’elenc al sarès lunc e pesant, soredut a pensâ che ogni positivitât dal pinsîr, dal sintî furlan e je stade voltade o in ridicul o in negatîf.
Ma cumò che o sin in Avrîl, che Pasche e je passade di pôc – come la fieste pal aniversari de nassite de Patrie dal Friûl – e che al rive ancje il 25, simpri di Avrîl, no us vegnial tal cjâf che dutis lis situazions a puedin jessi ribaltadis, che par fâ Pasche o sin passâts pe Passion, par celebrâ in cualchi mût la Patrie o vin mateât agns e pe Liberazion o vin patît fassiscj, todesc e cosacs.
Alore, l’insium di un alc di diviers al pues jessi ancjemò tignût in cont, in moments triscj che no somein passâ mai. A passaran invezit ancje lôr, parcè che la primevere no si pues fermâ nancje cul bazooka. Si à dome di no sierâ il barcon e fâ zirâ l’aiar.
DREE VALCIC