L’EDITORIÂL. Ma cui aial dite che si scuen simpri dimostrâ alc?

Cui aial dite che studiâ i classics nol covente plui? Al è il câs de Odissee, la storie di Odisseu, ma pardabon un cuadri de esistence umane, dal so jessi strambe. Salacor, nus tocje ancjemò di plui, noaltris furlans, par vie de vite di emigrants che o vin scugnût gloti par secui. E je, la Odissee, une opere liriche, corâl e tal stes timp e tocje ognidun di nô, par vie che diviers al è l’ategjament di ognidun, rispiet al so prossim, al rapuart cul sacri e cu la divinitât, a la famee, ai compagns di viaç.
Parcè cheste tirade? Parcè che al teatri di Udin je lade in sene une rapresentazion in marilenghe, tirade fûr apont dal libri di Omêr, e il judizi vignût fûr al è stât diferent. Cence jentrâ tai particolârs dal spetacul, la mê impression e je stade negative. O ai viodût sul palc, ma ancje in dute le operazion daûr, ancjemò une volte une cjapade pal cûl dai furlans.
Cu la scuse di fâ viodi che o sin brâfs, che o tradusìn dal grêc al furlan, o “mandìn in onde” une porcarie.
Intant no coventave une gnove dimostrazion: pre Checo nol voltavial la Bibie partint dal grêc? E po dopo, parcè vino di dimostrâ simpri alc?
Cualchidun mi à dite: «ma al someave bon un test furlan al Giovanni da Udine». O crôt che e pararès bon ancje une dignitose comedie in furlan, suntun test valit, recitade cun cure, ma rispietose dal so jessi comedie, dal so specific.
Par dîle dute, nol è un probleme artistic, ma ben politic. Ven a stâi, che si à di finîle di dimostrâ alc.
Par masse timp la idee di domandâ par plasê, di jessi resonevui, di spiegâ e di tornâ a spiegâ lis rasons da nestre identitât, nus àn puartât a pierdi di voli l’obietîf unic dal autonomisim: la autonomie apont.
Che al vûl dî, no dome la pussibilitât di autoguvier, no dome il dirit di jessi ce che o sin, ma soredut la libertât di pensâle ancje in maniere divierse di chei altris.
Se a Triest o a Rome, ma al vâl ancje par Milan o Vignesie, a crodin di podê decidi par noaltris, a àn di inacuarzisi che nol è dite che a puedin fâle francje.
Di sigûr si movaran i lôr servidôrs locâi, par fânus crodi che dut a è pal nestri ben, pal progrès intun mont globâl che nol pues pierdi timp cui cjampanîi e cu lis barufis di paîs.
E magari a son chei che a batevin lis mans tal teatri, contents di jessi stât presints a cheste rapresentazion di democrazie culturâl.
Ma i furlans no son int di baracon.
Dree Valcic