Sfuei Mensîl Furlan Indipendent
Archivi de Patrie

Lauc. Mostre permanente de civiltât contadine e… un comun di discuvierzi

............

Côt, codâr, falcet, refe, ristiel, batadorie, mede… talç, ghitare, pigne, stamp, sele, glove, sampogn, cjace forade, cit, siç, tamar, brume, celâr, cali, cjalderie… nons leâts ae Cjargne di un timp, indulà che lis ativitâts principâls a jerin leadis ae agriculture e ai animâi.
Cul passâ dal timp chestis ativitâts a son caladis e vuê chei che a van “a rezi” o a “fâ fen” o “a fâ formadi” a son simpri di mancul. Al è simpri plui râr, tai paisuts di mont, cjatâ inmò viertis e in funzion lis latariis.
Cirche un an fa, il Comun di Lauc al à volût tornâ a vierzi la latarie turnarie metint adun une mostre permanent dedicade ae filiere dal lat.
“La mostre – e spieghe la assessore ae culture Elisa Gressani – e vûl contâ la storie no dome di un passât ma ancje di un presint inmò vîf sul teritori. A son un grum di aziendis agriculis che a lavorin di bessolis il lat. Ducj i ogjets in mostre a son stâts regalâts di privâts e tancj recuperâts des vecjis latariis che a funzionavin in ogni frazion.”
Dongje ai imprescj significatîfs dal lavôr si cjate descrite, in cinc panei tematics, la procedure leade ae lavorazion dal lat, ae cure dai animâi e ae produzion dal fen, e ancje aes ativitâts des malghis ancjemò presintis sul nestri teritori. Ogni panel al à fotografiis, e al è un video che al conte une serie di testemoneancis cjapadis sù di Stefano Morandini: suns, vôs e rumôrs des malghis, de campagne e de latarie a tornin a rivivi e a fâsi sintî.
La mostre, visitade soredut des scuelis, e je une vore interessante e e jude a svicinâsi a di un mont cuasi dal dut dismenteât e dal sigûr gnûf pes gjenerazions zovinis. La mostre di Lauc e je vierte la sabide des 3 aes 5 dopomisdì e pal mês di Lui e di Avost ancje la domenie, des 10 a misdì, e des 3 aes 5 dopomisdì.
“Il Comun di Lauc – e continue Elisa – al da la pussibilitât a cui che al ven a fânus visite di fâ bielis cjaminadis tal mieç de nature (sedi a pît, che a cjaval e in bici) e ancje tal mieç de storie (la necropoli di Curs cui tombâi ingjavâts tal cret, la gleseute de Madone di Trave dulà che i fruts muarts “a tornavin a vivi par un marilamp juste il timp di jessi batiâts”, e v.i). Di Invier, si pues schiâ: o vin un piçul implant in Val di Lauc. Par di plui, chest an al cole l’aniversari dai 1.000 agns di storie dal Comun di Lauc e dal 20 di Jugn o vin une schirie di events che a laran a rindi plui vive dute la Istât.”
Nol reste che cjatâ la ocasion par inneâsi tal biel mieç de nature di Lauc, distirât tune biele alture jenfri l’Arvenis e la Val Tiliment, a 719 metris dal nivel dal mâr. ❚
Marta Vezzi

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +