Sfuei Mensîl Furlan Indipendent
Archivi de Patrie

L’aeropuart che nol rive a svolâ

............

Une volte si clamave Aeropuart di Roncjis, dopo al è deventât Aeropuart “Savorgnan di Brazzà”, cumò al è il Trieste Airport: dut câs, nol à mai funzionât. O cuasi. Ma cumò a son dôs gnovis che a podaressin mudâ il stât de situazion e dâ gnovis prospetivis a un sisteme dai traspuarts che in Friûl nol è mai stât masse eficient. La prime e je il fat che al è stât screât un grup intermodâl milionari che al fasarà rivâ cul tren i passizîrs dai avions drets in aeropuart. Il cost al è stât di 17 milions di euros: une cifre une vore penze, ma che e je coventade a realizâ un intervent a timp di record: pôc plui di un an. Pai timps che par solit o sin abituâts a viodi intes oparis publichis, al è stât pardabon un miracul.
Il vêr miracul però al sarès chel di atirâ i avions a Roncjis: e chest nol è cussì facil. Cuatri agns indaûr l’aeropuart di Triest (lu clamin cussì) al jere al vincjesim cuart puest inte classifiche taliane dal trafic dai passizîrs. Chest grant invistiment saraial bon di zontâ masse critiche al volum dai frecuentadôrs dal nestri aeropuart? Sal domandin in tancj, ancje parcè che il president de societât di gjestion Antonio Marano e il diretôr gjenerâl Marco Consalvo a àn par sigûr lavorât une vore in cheste direzion. Cence masse risultâts fin cumò, parcè che i gnûfs colegaments no durin masse. Par esempli, chel cun Gjenue al è za sierât daspò cualchi setemane de sô scree. Ma cumò, cuntune gnove autostazion, cun 16 scomparts in linie pai bus, un parcament multiplan di 500 puescj machine, un a nivel dal plan stradâl par 1000 veturis, saraial plui facil convinci lis compagniis aeriis a fâ svolâ i lôr avions di Roncjis? Ducj i citadins dal Friûl-Vignesie Julie a varessin di domandâlu cun fuarce parcè che a son chei che a tegnin in pîts l’aeropuart. Lu àn fat cui lôr bêçs, che l’aeropuart par agns e agns al à glotût cence frens. Intant il fren lu à metût il tapêt mobil che al puarte di une bande a chê altre dal sît: i 5 Stelle a àn postade une fotografie dal implant fer. Al pues jessi dome un incident, ma nol somee di bon auguri. Chel che al varès di preocupâ di plui al è il secont element di novitât che o disevin: ven a stâi che chescj invistiments di miorament a son stâts fats cui nestris bêçs, come se a fossin part di un program di valorizazion di une societât publiche. Invezit a coventin a fâ cressi il valôr dal aeropuart par vendilu. Al è in vore il procès di privatizazion dal 45% des cuotis de societât di gjestion. E a son interessâts grancj grups tant che la societât di gjestion dal aeropuart di Frankfurt, Fraport, che e à za il 75% dal aeropuart di Lubiane; ma e je ancje Save, parone dal aeropuart di Vignesie (cressût dal 7% intant che il nestri al calave), e il grup cinês di Hainan Airlines. Ancje Toscana Aeroporti e Atlantia dal grup Benetton a son in corse, ma no si capìs se a àn une strategjie precise o se a vuelin dome cressi in tiermins di asset. Il “nestri” aeropuart, in sumis, forsit nol sarà plui nestri e i grancj invistiments fats a laran a insiorâ cualchidun altri. La robe pardabon impuartante e sarès rivâ a fâ viazâ miôr la int che cumò, par lâ ator pal mont, e scuen dispès partî di Vignesie, Verone o Milan: par no jessi plui intun cjanton bandonât de Italie, ma scuvierzisi pardabon tal cûr de Europe. ❚
L’Ors di Pani

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +