LA VÔS DE CISL. Redits che a derivin de vendite di imobii. Tassazion des plusvalencis

Cuant che un privât al vent un imobil, teren o fabricât, al nas simpri il dubi se al varà di paiâ lis tassis sul redit cjapât. Inte plui part dai câs, il privât nol paie nissune tasse, ancje se di solit al oten un vuadagn in gracie dal aument di valôr che si à tra l’acuist e la vendite. Chest vuadagn, clamât plusvalence, al è tassât di fat dome in cualchi câs previodût di pueste de leç (artt. 67 e 68 dal test unic des impuestis sui redits).
FABRICÂTS – TERENS AGRICUI
Se o cêt un fabricât di cualsisedi gjenar (abitazions, uficis, capanons) o un teren calcolât agricul, si gjenere une plusvalence di tassâ dome cuant che chescj a son stâts cuistâts (o costruîts) di mancul di cinc agns, parcè che al ven presumût un intindiment speculatîf inte vendite, dopo un periodi di possès cussì curt.
A son previodudis però ecezions. Se l’acuist al è par sucession al decjât il vincul dai 5 agns e o pues rivendi l’imobil in cualsisedi moment, cence vê di preocupâmi de tassazion de pussibile plusvalence.
E je tassade invezit la plusvalence in câs di vendite di un imobil vût in donazion dentri di cinc agns dal acuist precedent de bande di chel che al done. Il valôr iniziâl al è il presit che chel che al done al à paiât par cuistâ l’imobil.
Ultin câs di esclusion de tassazion, al rivuarde i fabricâts che inte plui part dal periodi che al passe tra l’acuist e la vendite a sedin stâts assegnâts a abitazion principâl dal proprietari e di siei familiârs (art. 5 TUIR). No je dovude nissune tassazion, ancje se il periodi di possès si è puartât indenant par mancul di 5 agns.
AREIS EDIFICABILIS
La vendite di terens edificabii, se e prodûs une plusvalence, e je simpri tassade.
CALCUL DE TASSAZION
Il prin pas al è valutâ se la cession e à gjenerât plusvalence, o sedi un util.
De diference tra il corispetîf di vendite e il cost di acuist (maiorât di dutis lis cjamis zontadis tant che coscj di periziis, parcelis notarîls, e v.i.) al pues gjenerâsi un util (plusvalence) o une pierdite (minusvalence).
Intal câs di fabricâts/terens agricui, la plusvalence e rapresente un redit diviers sogjet a tassazion ordenarie. Chest al prodûs un efiet “grum” cun chei altris redits dal contribuent (lavôr, pension, fits) cun consecuence, par vie de progressivitât des alicuotis Irpef, di une cjame fiscâl une vore alte.
Par evitâ cheste “tassazion super”, al è simpri convenient domandâ al nodâr che al stipule l’at di vendite la aplicazion de impueste sostitutive dal 20%.
Intal câs invezit des areis edificabilis, e ven dade la pussibilitât di sielzi tra la tassazion ordenarie e la tassazion separade (anticip dal 20% cuant che si fâs la declarazion dai redits, e salt di paiâ dopo su la base di un ricalcul fat de Agjenzie des Jentradis dome su la plusvalence).
Ultime pussibilitât par ridusi la tassazion e je chê ufierte in maniere periodiche dal legjislatôr cu la rideterminazion dal valôr fiscâl dai terens edificabii e agricui. E ven dade la pussibilitât di presentâ une perizie di stime zurade che e identifichi il valôr di marcjât dal teren. Su chest valôr si met une impueste sostitutive dal 4% (rateizabile in 3 agns). Intal câs di vendite, il valôr de perizie al ven cjapât tant che cost di acuist. Chest al significhe che se la vendite e ven fate dentri di un timp curt, cence che al sedi cressût ancjemò il valôr, no je nissune plusvalence. Cumò però cheste pussibilitât no je atuabile, stant che la ultime vierzidure dai tiermins pe rideterminazion dal valôr si è concludude in Jugn. ❚
✒ Marianninna Rocco, Responsabile Fiscâl CAF CISL Udin