Sfuei Mensîl Furlan Indipendent
Archivi de Patrie

LA VÔS DE CISL. Il 730/2014 e lis novitâts

............

Il 730 e je une declarazion dai redits semplificade che il contribuent al pues precompilâ inte part espositive dai dâts. Al sarà dopo compit dal Caf elaborâ i calcui des detrazions e determinâ il risultât finâl. La presentazion dal model precompilât e je gratuite pal contribuent. Intal câs là che il contribuent al vueli assistence inte compilazion dal mod. 730 al è previodût il paiament di un compens ae societât che e gjestìs il Caf, su la base di un tarifari fat public midiant afission inte proprie sede di lavôr.
*** Il 730 al pues jessi scrit ancje in forme comune tra coniugâts.
La forme comune e je conseade intai câs là che un dai doi coniugâts nol varès lis carateristichis par elaborâ il mod. 730, ma al varès di ripleâ sul mod. Unico. Soredut situazions di declarazions che a finissin cuntun credit: se si dopre il mod. 730 i timps di rimbors a son tant plui svelts stant che il sostitût di impueste al anticipe lis sumis a non dal stât. Mentri che, doprant il mod. Unico, al tocje spietâ i timps dal rimbors diret de bande de aministrazion publiche, a vuê plui o mancul 2 agns.
*** Grande novitât di chest an, e je la pussibilitât di elaborâ il 730 ancje in assence di sostitût di impueste, o ben cence vê un datôr di lavôr o ent pensionistic che intai mês di Lui – Avost dal 2014 al sedi in stât di fâ lis diferencis (a debit o a credit) che a risultin de declarazion presentade al Caf di Març a Mai.
*** Il tiermin ultin par presentâ il mod. 730 a vuê al è ai 31 di Mai dal 2014. Intai agns passâts a son stâts frecuents i câs di proroghis fin a metât di Jugn, ma chest an cheste eventualitât no je stade ancjemò ipotizade. Duncje, o conseìn a ducj di ativâsi par rispietâ la scjadince.
*** Altre novitât e rivuarde lis proprietâts imobiliârs. Su terens e fabricâts e pese la Imu che e à un efiet sostitutîf de Irpef. Ce vuelial dî? Che, se par un teren o un fabricât o pai la Imu (ancje se in misure minôr cemût che al è stât il câs de mini-Imu), chel imobil nol prodûs redit ai fins Irpef e duncje nol fâs grum cun chei altris redits pe tassazion.
*** Ma intal 2013, e je stade abolide la Imu su la abitazion principâl, cu la ecezion di cualchi comun che al à aplicade la mini-Imu. Si che duncje, se la abitazion principâl no à paiât la Imu, intal mod. 730 chest fabricât al incidarà tant che redit ai fins Irpef.
*** Ae fin dal 2013, la Leç di Stabilitât e previodeve la esigjence di cuvierzi un deficit di belanç de bande dal stât midiant il tai lineâr des detrazions Irpef dal 19% al 18%, cun efiet retroatîf a dut il 2013.
Eventualitât che, par fortune, e je stade evitade par chest an.
Dut câs, in misure limitade, la manarie dal stât si è butade jù su lis detrazions, e plui di precîs su lis assicurazions vite, sbassant il limit di spese di podê detrai di 1.291,14 a 630 euros.
Cheste novitât di fat e fâs ancjemò plui golose la sotscrizion di plans pensionistics complementârs tal puest des polizis vite, stant che la alicuote di rimbors in chescj câs e va dal 23% fin al 43%, e e previôt un limit di spese di 5.146,57 euros.
*** Ultime novitât pal an di impueste 2013, e je la pussibilitât di detrai al 24% invezit che al 19% lis spesis pes erogazions liberâls (donazions) aes Onlus e ai partîts politics. Dal 2014, la alicuote e larà sù ancjemò di plui al 26%. ❚ ✒ M.R. Responsabile Fiscâl Caf Cisl Udin

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +