Sfuei Mensîl Furlan Indipendent
Archivi de Patrie

La vere “spending review” e je costituide de manutenzion dal teritori e dal nestri paisaç agroforestâl, invezit che des oparis cjaris che a coventin par comedâ i dams dai diluvis, peâts ae mancjance di costants restaurs

............

Il patrimoni dai bens culturâi che al identifiche une regjon, che indi esprim lis particolaritâts a pet di altris regjons o teritoris, al è costituît ancje di oparis – in aparence mancul visibilis ma di un valôr superiôr – tant che manufats costruîts dal inzen dai siei abitants, che par solit a son pôc calcolâts a pet di palaçs, vilis, borcs, gleseutis votivis. Ma lis “oparis di art” di regjimazion idrauliche, ancje di 60 agns indaûr, a jerin e a son determinantis par vivi intun ambient rurâl cun ecuilibris naturâi delicâts, ma plens di fatôrs produtîfs di riscuvierzi. A son chês “oparis di art” di difese dal teren, di canalizazion des aghis, di irigazion o di deflùs, di contigniment di assets stradâi cun fossâi di drenament, che o vin ereditât tant che “cualitât” dal dissen dal paisaç furlan. E ce dî dai filârs di morârs che, di là di segnâ l’asset fondiari, a tegnin sù ancjemò vuê i terens des spuindis di fossâi, canâi, jets fluviâi torenziâi.
I inzegnîrs idraulics dal Friûl a son cognossûts ancje in altris parts dal mont, pe lôr esperience inte bioinzegnarie. Ma ancje i agricultôrs plui anzians a son vêrs mestris e cognossidôrs de costruzion naturâl e ricostruzion dal ambient rurâl, di rostis, di bacins di difese naturâl di flums, di lâts artificiâi di racuelte di aghis ploianis par orts e abitazions, di bacins di laminazion des aghis di plene dai torints, di puints a brene o di vâts a ristiel pal contigniment des gleriis e dai inerts che a precipitin a val, se di no a rodolaressin jù des monts su stradis e autostradis.
Chest patrimoni culturâl enormi di tecnichis e di esperiencis progjetuâls di assets agro-idro-gjeo-morfologjics e forestâi, leât a strent ai compuartaments dai agjents atmosferics, aes previsions dal timp, aes stagjons, al è simpri mancul cjapât in considerazion dai publics aministradôrs, simpri mancul studiât dai protagoniscj de conservazion, dal restaur e dal ripristinament dal ambient rurâl. Epûr, chest aparât tecnic e chestis maestrancis furlanis a àn bonificât i palûts des planuris pontinis, a àn disvilupât la economie rurâl a Sabaudie e a Latine intai agns ’30 dal 1900. Ma, in primis, a àn mostrât lis lôr capacitâts in cjanâl Pedarç, inte costruzion slargjade dai teraçaments cun grisiolis vivis, di difese des cuestis di mont, des oparis minuziosis di murets di cuintriscarpade e brenis capilârs mistis di len e di clapigne convesse, dilunc des stradis di malghe a Preon, a Mion, a Rigulât, a Paulâr, a Pas Mededis, fin ae note e ancjemò resistente sistemazion idrauliche forestâl, dal 1927, dal Bacin dal Riul Pontaibe in Cjargne.
Ben cognossût al è il “manuâl di oparis di difese dal teren” dai prins agns dal 1900, dal inzegnîr Mingotti, furlan espert di bioinzegnarie che i inzegnîrs e i architets di “manualitât” inte realizazion di oparis a difese e deflùs dai riui di mont no cognossin, ma che vuê invezit o vin di onorâ pal contribût sientific ae tutele di chest “patrimoni di bens culturâi dal Friûl”. Unic metodi aplicatîf che o vin di doprâ se o volìn evitâ disastris naturâi e slacs, come chel resint di Masaruelis di Torean che al à strissinât a val ancje la strade. Metodologjiis di intervent di manutenzion dal paisaç che o vin di tornâ a adotâ se o volìn evitâ disastris naturâi, simpri plui frecuents tant che intal rest di Italie, ancje par colpe dai cambiaments climatics.
Epûr, o jerin e o podìn jessi ancjemò un esempli pe Italie. Il Parc dal Cormôr, i siei agadôrs, i siei prâts e teracis dai arzins, lis sôs bassanis artificiâls, fatis intai agns ’90 dal 1900, vuê a fasin la funzion ideâl di bonâ la corse des aghis di esondazion a val, ridusint i inagaments viers Udin Sud, Cjampfuarmit, Çuian.
Ciertis oparis idraulichis, di difese des spuindis dal torint cun chebis di pieris, di rifasiment des areis tacadis des spuindis distrutis des araduris intensivis, di restaurazion di prâts stabii, di rimboscaments ripariâi, a àn rapresentât inte Val dal Cormôr une sorte di bon esempli di “manutenzion” dal teritori.
Oparis che a podaressin jessi completadis cu la agadorie, esistente ai prins agns dal 1900, da pît des altis teracis a bosc dal Centri fieristic, progjetade pal Parc dal Cormôr ma no ancjemò fate dal Comun di Udin, cun consecuencis gravis di erosion des rivis dal torint plui a Sud.
Al è ciert che ancje lis urbanizazions ecessivis a Nord e a Sud di Udin, tra Basandiele, Sant Domeni, Cormôr Bas, Pasian di Prât, masse ad ôr de Val dal Cormôr – se no ancje inte stesse val e intes areis naturâls dilunc dal jet -, a àn fat deventâ il teritori plui fragjil. Chest, ancje par colpe di gnovis imissions di condotis di aghis refluis e in particolâr cence il slargjament naturâl e duncje la dispersion intes campagnis de fôs. Chê naturalitât tant utile e je stade comprometude de canalizazion a Mortean e duncje, in câs di ploie ecezionâl, si doprin lis “paradanis” des “cassis di espansion” a  Cjasteons di Strade e a Talmassons par evitâ erosions di spuinde; cussì il torint, “cence dams”, al pues rivâ al canâl che al puarte lis aghis in Lagune.
Une altre opare di regjimazion idrauliche riessude in Friûl – dal pont di viste idrotecnic di buine manutenzion dal teritori e di tutele parziâl de integritât de morfologjie dal teren di un ben culturâl tant che l’ambient rurâl dal Palmarin e de fuartece di Palme – e je costituide dal sigûr de grande puartade de “agadorie”. Chest canâl al à salvât di pôc di diluvions e inagaments tancj paîs e borcs, cjasis e aziendis agriculis sul teritori.
Ancje intal câs di Palme, inte opare lodevule di dislidrisament de vegjetazion infestante tra lis grandis pieris des possentis muris di fortificazion dal Cuatricent de citât – come pûr des fortificazions plui esternis di là dai “cjamps di tîr”, par esempli des “lunetis” -, e mancje la aplicazion imediade dai intervents di drenament, di “fossâi di vuardie”, di agadôrs, di difese dai teraplens artificiâi fortificâts che, diliberâts des lidrîs de vegjetazion che ju infeste, a cedin bande i rivelins e i fossâi. E mancje ancje in chest câs la aplicazion dal manuâl tradizionâl di difese dal teren che al à origjin dai tratâts Leonardians.
Ma manutenzions e restaurs no fats dai assets storics agro-idro-gjeomorfologjics che o vin ereditât da nestris nonos agricultôrs, agrimensôrs, inzegnîrs idraulics, architets dal paisaç, dai agns tra il 1800 e il 1950, a àn fat dificil il deflùs di diluvions provocadis dai mês di ploie che a son a pene stâts, intes campagnis di Gonârs ma ancje dongje i borcs storics rurâi di chê aree.
La stesse mancjance di oparis di restaur – restaurazion di cheste culture de manutenzion agroforestâl e agroidrauliche che o ereditìn, ancjemò visibile intes campagnis, leade a strent ae culture insediative e ae sô sigurece – e je vignude di pôc in lûs intant des esondazions dai mês passâts, come pûr tai agns indaûr, dal Flum Reghine dongje Sant Stin de Livence. Tant interessant il coment dai abitants di Brugnere-Cjistiel, su la Livence, subit dopo il spandiment dal flum intal borc, dulà che la aghe e cîr il propri antîc percors di un canâl agadôr dai prins dal 1900 che al acete lis aghis de grande voltade dal stes flum dongje dal ex puartut, che cumò si bute jù tra lis cjasis di un gnûf insediament abitatîf. O lassìn di comentâ lis resintis plenis, ciclichis ancje chestis, dai flums Ausse, dongje Aquilee, dal Stele, dal Cuar a Sant Denêl.
Ma ae origjin de mancjance aromai croniche des ativitâts di manutenzion dal asset idraulic dal spazi rurâl, vitâl pe vite dai borcs storics dal Friûl, di restaur des oparis di difese dal teren in grande part cognossudis ai abitants dal lûc, al va cjapât dentri ancje il slac di Sedilis che, lis setemanis passadis, in Comun di Tarcint, al à butât jù, su stradis e cjamps, 70 mil metris cubis di teren.
Esempli positîf invezit al è costituît de esistence, interece, o podìn definî “conservazion” des areis dai terens dongje i arzins de Midune, dongje Tremeacque di Pasian, che cundut de plene di Fevrâr, a son coventâts a contignî i inagaments, cetant probabii, a Cjons, Budoie, Fontanefrede, Montreâl, Pinçan e Prate.
Lis cronichis dai cuotidians a ripuartin di un continui lis informazions su lis provis di restaurazion de viabilitât de bande di volontaris e Protezion Civîl, rindûts inutii di une “brose ecezionâl” che e veve dislidrisât une cuantitât enorme di arbui, strissinant grandis cuantitâts di materiâi terenôs, clapignôs e coladis di pantan su la cjarezade alte di Taipane viers Platiscjis, Montmaiôr e Prosenic.
Ma i diluvis a son ogni an definitîfs “ecezionâi”, “impreviscj”. Ogni an a vegnin doprâts chescj tiermins che a justifichin la precarietât dal teritori, la sô fragjilitât, a front de ecezionalitât dai avigniments. Invezit e va eliminade la terminologjie de “ecezionalitât” dai avigniments atmosferics, a front de sêt di cognossince dai citadins su la conservazion e manutenzion dal teritori naturâl, cjapant dentri in cheste manutenzion ancje lis “buinis pratichis” di difese dal teren che a son stadis aplicadis fin ai agns ’50 dal 1900.
La nestre Regjon e la Italie a spindin ogni an varis miliarts par arzarâ lis “emergjencis” peadis aes ripetizions de “ecezionalitât” dal clime, dal uragan, dal ciclon e cussì vie.
Une dì, i nestris aministradôrs publics a varan di scomençâ a capî che nol à sens spindi cifris simpri plui altis e impaiabilis par medeâ “dams” provocâts des mancjadis manutenzions dal teritori, di plui di cetant che si spint invezit par evitâ chei dams. E je la manutenzion, la restaurazion costante des oparis, che za a àn dimostrât la lôr eficacitât pe difese dal teren, la ricostruzion costante des sôs cualitâts produtivis e de bielece dal nestri paisaç, che a garantissin la riduzion des spesis publichis. ❚
✒ Arch. Roberto Pirzio-Biroli

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +