La ultime fadie leterarie di Otto D’Angelo, pitôr dal Friûl

La vene dal artist di Cjaurià, origjinari di Sunviele, e continue a butâ fûr. Dopo di vê proponût i siei ricuarts e memoriis mediant imagjinis sul mont contadin, mostrantnus la muse  di chê civiltât contadine tai volums “Immagini di una civiltà” dal 1987, “Il volto di una civiltà”, jessût tal 1998, al à po volût pandi il so grazie a la femine furlane tal 2006 cul volum “La femine furlane”. Tal 2004 al veve dât il so contribût tal librut “I sueis”. Considerade la grandonone cuantitât da la produzion artistiche di Otto, dopo chestis sintesis, un altri filon al podarès riguardâ, par esempli, i fruts furlans, cui lôr zûcs, cui lavôrs ch’a fasevin e v.i.
Cumò Otto, in chest gnûf lavôr “Friûl: i paîs da la memorie”, nus proferìs il contegnidôr di chei protagoniscj, intun volum di passe 400 pagjinis, dulà che a son piturâts 219 paîs furlans, da la Cjargne, a la Basse, di ca e di là da l’aghe. Alore, passant lis pagjinis, si cjatìn intune sorte di viaç ator pal Friûl intai prins agns dal secul passât. Si trate di ilustrazions puntuâls e curadis. Dut l’insieme al cjape un particolâr valôr di caratar documentâl. A son, chescj cuadris, ogjetivis pussibilitâts di confront cun “fotografiis”, che par altri no esistin ta la plui part dai câs, tra la muse dai nestris borcs d’antan e lis imagjinis di vuê, cu lis invasions dal ciment e dal asfalt, di machinis, di cartei. Il vieri aspiet urbanistic, assolutamentri origjinari e unic in Italie, al è cumò bandonât. I nestris paîs a son scjavaçâts di une sorte di strade-canâl, cuntune dople cortine di fabricâts (i pensi a chei maraveôs borcs dal Friûl di Mieç come Baracêt, Colorêt …); si jentre di un puarton intune sorte di cjistiel dai puars e dentri si cjatin lis corts, i curtîi, cun tantis fameis. Il stes Otto si vise che tal so curtîl a vivevin passe 40 personis. Vuê, chescj paîs a son disvuedâts di animis, di fruts, di oms, di feminis; a jerin paîs di suns, di sunsûrs, paîs di odôrs. Lûcs che a jerin dutun cu lis personis, cu la nature intune armonie totâl, dulà che vuê chescj lûcs si pierdin tal mismàs dai spazis, dal trafic, tra mil cartei. E je cheste la denuncie che Otto al fâs.
Ma la vite di chescj cuadris e je rapresentade ancje da lis personis che a vivevin  ator di chescj fabricâts: i contadins, lis feminis, i fruts, i predis, i artigjans, i marcjadants, lis fantatis, i viei. Cussì, dongje dal valôr documentâl urbanistic, al ven fûr il valôr etnografic dai cuadris di Otto: scrusinantju, nus vegnin indevant i personagjos cui lôr vistîts difarents, cui lôr imprescj, cu lis lôr usancis.
Si fâs memorie pai 936 agns da la Patrie dal Friûl. La bole imperiâl dade fûr a Pavie ai 3 di Avrîl dal 1077 e tache cun chestis peraulis: Patrorum nostrorum orthodoxorum exempla secuti, a dî lant daûr cun fedeltât dai insegnaments dai nestris paris … Po ben, Otto al à declinât fin insom i insegnaments dai siei paris, al è stât e al è un esempli che cu lis sôs oparis al à cun braure tignût alt i valôrs da la civiltât contadine e da la culture furlane.
Chest al è ce che al ven fûr e si po lei da lis imagjinis, ancje mediant dai coments ai cuadris. Coments insiorâts cun  storiis di tradizions, di usancis, di blecs di storie locâl. Lavôr fat di studiôs, di esperts di grande innomine e tant preseâts; dongje di chel ch’al scrîf, a àn colaborât tai tescj Adriana Miceu, Guido Sut e Celestino Vezzi.
Cun ogni cuadri, Otto nus torne, nus da indaûr al che materialmentri nol esist plui. Nus torne chei valôrs, chei sentiments che a son lis lidrîs da la nestre identitât, lis lidrîs dal popul furlan. Se o vin di protezisi (e o scugnìn) dal unvier dal spirit che al ven paronant, poben la protezion, il santuari lu cjatìn in chei valôrs che graziis a Otto i podìn ancjemò emozionâsi a ricuardâ. Ve chi la atualitât dal so messaç e di conseguence la sô modernitât. Mediant da l’art Otto al è bon di evocâ valôrs dismenteâts e chescj risultâts ju à rivâts parcè che il so pinel al è stât guidât dal grant amôr che lui al pant par la sô tiere e par la sô int. E di chest, Otto, il Friûl ti varà simpri agrât.
✒ Gotart Mitri