LA TIERE E LA GREPIE. Plui web e robots pes stalis furlanis

Trop sono tecnologjichis lis nestris aziendis zootecnichis? Al cuesît al à cirût di rispuindi l’Istat cuntun so rapuart resint focalizât su “La difusion des tecnologjiis intes aziendis zootecnichis, an 2020”. I risultâts principâi che a son saltâts fûr de investigazion a mostrin che il 16,1% des aziendis campionadis al à un sît web o une pagjine social e il 71,2% al dopre struments di precision.
L’acès a une conetivitât svelte e afidabile, la disponibilitât di capitâl uman che al vedi lis competencis che a coventin par doprâ struments tecnologjics evolûts, la sielte dal digjitâl tant che invistiment necessari ancje se cjâr, a son elements di inovazion pe competitivitât e pe sostignibilitât des produzions des aziendis zootecnichis, che però a patissin ancjemò di un divari digjitâl fuart. Cun dut achel, il miorament al è net a pet di ce che al jere stât rilevât dal Censiment gjenerâl de agriculture dal 2010 cuant che dome il 3,8% des aziendis agriculis al veve inviât procès di digjitalizazion e l’1,2% al navigave su Internet. Intal 2020, cuasi une aziende su trê e je dotade di computer, di une conession e des competencis digjitâls, intun contest là che la Italie si cjate al vincjesim cuint puest inte graduatorie europeane dal “indiç di digjitalizazion”.
La situazion a Nordest
Il 52,8% des aziendis zootecnichis talianis al à declarât di doprâ une conession in bande largje (il 61,4% intal Nordest). Cheste proporzion e cambie se si calcolin lis dimensions aziendâls. La cuote di aziendis dal Nordest cun plui di 5 assegnâts colegadis in rêt e rive al 83,6%. Sul teritori, invezit, la plui grande difusion di conessions sveltis si rileve tra lis aziendis dal Nordovest (63,1%).
Par ce che al tocje l’ûs di plateformis social, la adozion di strategjiis in linie par cressi la visibilitât e par promovi i propris prodots e mostre ancjemò un divari digjitâl fuart. La presince di sîts web e di profîi aziendâi su lis rêts social, di fat, e interesse dome il 16,1% des aziendis talianis intervistadis. Ancje in chest câs, la dimension aziendâl e à un rûl culminatîf: al è presint in linie il 51,6% des aziendis zootecnichis dal Nordest cun plui di 5 lavoradôrs; il 22,1% di chês cun 1-5 lavoradôrs e il 17,8% des aziendis dome cuntun sôl lavoradôr.
Tra i servizis ufierts sul sît aziendâl o sui propris profîi social, tal prin puest a figurin la descrizion di prodots o servizis e lis informazions sui presits (98,4% di aziendis), po dopo a grande distance la vendite in linie (34,9%), lis informazions su cualitât, sostignibilitât e sigurece dai prodots (13,4%) e la segnabilitât dai ordins (11,6%).
Par ce che al tocje i sistemis o i machinaris di zootecnie di precision introdots inte ativitât produtive, chei plui difondûts a son i sistemis informatics pe gjestion de mandrie (47,8%), po dopo i sistemis pal monitorament de ativitât produtive e riprodutive (41,0%), chei deputâts ae gjestion di lontan de identificazion dai animâi (29,9%) e i robots pe molzidure (21,4%).  ❚