La specialitât e va praticade, no predicjade

Lis impresis furlanis no stan ben, par nuie.
In provincie di Udin, intal periodi che al va dal 2009 al 2013, a àn sierât 379 aziendis dal manifaturîr su lis 886 pierdudis in Regjon. Simpri in provincie di Udin, intal prin semestri di chest an, si son pierdudis 56 impresis des 141 sieradis in Friûl-VJ.
Nol pues duncje consolâ nancje il dât positîf che al rivuarde la nassite di aziendis “start up” che no je fasin a avualâ ni il numar di impresis sieradis e nancje la cuantitât di lavoradôrs pierdûts.
E si indi à pierdûts pardabon tancj in chescj agns di puescj di vore! E ancjemò no je finide, magari cussì no!
Intant che in Italie, intai prins siet mês di chest an, la Casse Integrazion Vuadagns (Cig) e je calade in medie di cirche il 8%, in provincie di Udin, invezit, e je cressude di plui dal 20%!
Ce che al preocupe di plui al è che la Cig Speciâl, cuntun +32,4%, e je in aument fuart, che a son simpri plui numerôs i lavoradôrs folcjâts in cheste vere e proprie strente anticjamare dai licenziaments.
Di Zenâr a Mai dal 2014, i lavoradôrs metûts in mobilitât a son cressûts di plui dal 19% e, finide la mobilitât, a saran tes mans di un marcjât dal lavôr che  nol è in stât di ufrîur nissune oportunitât di vore, stant che la soference e rivuarde ducj i comparts, no dome chel manifaturîr.
La stesse aministrazion regjonâl, di fat, e previôt une incressite dal Pil tant plui basse di che che si spietavisi dome cualchi mês indaûr.
Al bisugne dâsi di fâ, chi e cumò, par rilançâ il sisteme produtîf e il lavôr, cence spietâ che – cemût che al è dut câs di podê auspicâ – a cambin di plante fûr lis politichis monetariis e finanziariis de Comunitât Europeane.
Lis energjiis necessariis pe riprese a van cjatadis fûr prin di dut inte impostazion dute furlane dal “dâsi di fâ”, cence spietâsi masse di chei altris.
Se al è vêr che la crisi e je globâl, al è ancjetant vêr che je fasaran a restâ impins chei teritoris che a savaran meti in cjamp propriis e origjinâls progjetualitâts e azions economichis, istituzionâls, sociâls e culturâls. La vie di jessude pal Friûl, duncje, le à di cirî e cjatâ il Friûl stes, viert dal sigûr a un contest nazionâl, european, mondiâl.
Ve alore che la specialitât e la autonomie no van declamadis ma esercitadis in mût virtuôs (a diference di ce che al è stât intai ultins agns), par no alimentâ chê voie di neocentralisim che cumò e va tant di mode.
La Regjon Friûl-VJ e pues, inte sô “specialitât”, rindi la burocrazie amie des impresis e dai citadins ancje cu la future riforme dai ents locâi; acompagnâ lis impresis in gnûfs marcjâts forescj; comedâ lis propriis finanziariis (Friulia, Mediocredito, Finest) e doprâlis a supuart des impresis; promovi oparis publichis su scjale locâl (scuelis, stradis, ambient, e v.i.) par fâ lavorâ lis piçulis e piçulissimis impresis, adeguant cussì il patrimoni coletîf che, cualchi volte, al è deteriorât; soperî ae strente creditizie cul ûs di risorsis comunitariis; promovi ancjemò di plui une formazion smirade dentri di politichis ativis dal lavôr sedi dipendent che autonom; e v.i.
Al va fat pardabon dut il pussibil par che la stagjon triste (ma chê buine no si è viodude) no puarti vie cun se altris aziendis e altris puescj di vore. ❚
Roberto Muradore