La scuele furlane e vûl sorevivi: i sindics a clamin, il ministeri al tâs

Nissune rispueste. Ancje se l’apel dal president de Assemblee de Comunitât Linguistiche Furlane Markus Maurmair lu vevin firmât nuie mancul che sessante sindics – e jenfri di lôr a jerin ancje i prins citadins dai trê cjaf lûcs dal Friûl Pietro Fontanini par Udin, Alessandro Ciriani par Pordenon e Rodolfo Ziberna par Gurize – par cumò al è colât intal vueit. A jerin ducj dacuardi par domandâ al Ufici Scolastic Regjonâl di fâ ogni sfuarç par informâ e sburtâ i istitûts scolastics a doprâ lis normis di protezion dai dirits des minorancis linguistichis, che a permetaressin (se si lu domande) di ridusi il numar minim dai arlêfs che a coventin a componi lis classis di 15 a 10 intes zonis che si declarin furlanofonis.
◆ No cate cheste mobilitazion, de emanazion dal Ministeri de Istruzion no je vignude peraule par chescj aministradôrs, che a àn fat il lôr lavôr tal segnalâ i efiets negatîfs dal câl demografic su lis lôr comunitâts. Ma l’USR nol à timp o voie di resonâ cui sindics che si domandin cemût rivâ a no sierâ intîrs ples scolastics a risi di sopression, cun dut ce che al è peât a chest in fat di pierdite di puescj di vore e di identitât dai nestris paîs, dulà che sierâ la scuele al vûl dî tacâ a fâju murî.
◆ La problematiche dut câs no je dome dai paisuts. Si viôt ancje tes citâts, come che a pandin lis firmis di Fontanini, Ciriani e Ziberna: e al è incredibil che no si vueli ricori a une soluzion che e je za sot man di ben 13 agns! Di fat si cjate tes disposizions dal DPR 81/2009 che – purtrop – no son cognossudis nancje dai operadôrs dal setôr. Almancul chenti, parcè che in Venit si son inacuarts di cheste norme e cualchi Comun al à domandât di vê la deroghe sui numars minims propit pe presince sul teritori di une componente che e fevele la lenghe furlane.
◆ In Friûl, dulà che lenghe e identitât furlane a varessin di jessi part costitutive de Autonomie regjonâl, invezit, e à di jessi la Aclif a puartâ in rilêf une cuistion che no je dome une cuistion di justizie, ma che e pues jessi une vore funzionâl al nestri sisteme scolastic. Podê meti dongje classis plui piçulis al judarès ancje a stiçâ une didatiche plui inclusive, soredut là che si àn tancj arlêfs cun dibisugnis educativis particolârs o li che a son grancj flus migratoris o un alt risi di abandon de frecuence (e chest al è propit il câs des perifariis des citâts). In sumis, si larès a miorâ la scuele.
◆ Par fâlu, però, bisugnarès ricognossi che il Friûl, i furlans e il furlan a esistin: e che a àn une dignitât. Il Stât talian, almancul inte sô emanazion istituzionâl peade ae scuele, nol è ancjemò pront a fâlu. E nô, mestris, gjenitôrs, sorestants furlans sino pronts a rivendicâ il dirit dai nestris fruts di vê une scuele di cualitât e di prossimitât? O la sotanance ise za complete? ❚