Il cambiament al jere tal aiar. Ai 24 di Avrîl in Slovenie a son stadis lis elezions par rinovâ il parlament, e il vincidôr al è il Moviment Libertât (par sloven Gibanje Svoboda) di Robert Golob, che al sarà dal sigûr il gnûf president dal consei. Il so partît al à cjapât il 34,5% dai vôts e al varà 41 deputâts. Secont al è il Partît democratic sloven (Slovenska demokratska stranka) dal premier di centridrete di prin, Janez Janša. Al à cjapât il 23,52% dai vôts e al varà 27 deputâts.
◆ Tal Parlament sloven a son jentrâts inmò trê partîts. I democristians di Gnove Slovenie (Nova Slovenija) a àn cjapât il 6,87% dai vôts e a varan 8 deputâts; i Democratics sociâi (Socialni demokrati) a àn vût il 6,66% dai vôts e a varan 7 deputâts; la Çampe (Levica), invezit, e à vût 4,43% dai vôts e e varà 5 elets. La partecipazion e je stade dal 70,33% dai eletôrs.
◆ A son stâts confermâts ducj i doi i deputâts des minorancis linguistichis che a son tal Parlament sloven: a rapresentâ chê taliane al sarà inmò Felice Žiža, par chê ongjarese simpri Ferenc Horvath.
◆ Il Parlament sloven al à 90 puescj, duncje, cun chescj numars, il gnûf guvier al sarà di centriçampe. Facil che il Moviment Libertât al meti adun une coalizion cui Democratics sociâi e cu la Çampe. Il prin ministri in pectore, Robert Golob, al à dit che nol esclût di invidâ a colaborâ ancje i partîts di Marjan Šarec e di Alenka Bratušek, che no àn superât il liminâr par jentrâ tal Parlament.
◆ Golob, 55 agns, al è nassût a Šempeter pri Gorici, dongje Gurize. Chest al fâs ben sperâ il Friûl massime par ce che al tocje Gurize e Nova Gorica Capitâl europeane de culture 2025. Tal 1989 si è laureât inzegnîr te Facoltât di eletrotecniche a Lubiane, tal 1994 al à cjapât il dotorât. Al è sposât e al à trê fîs. Nol è une muse gnove te politiche: tal passât al è bielzà stât atîf tai partîts di centriçampe Slovenie positive (Pozitivna Slovenija) e tal partît di Alenka Bratušek.
◆ Il Moviment Libertât al è nassût sul tacâ dal 2022 cuntun cambi di non dal Partît des azions verdis, Z.DEJ. Fintremai prime di jessi atîf in politiche, Golob al jere cognossût soredut tant che president de societât energjetiche Gen-I: la sô esperience li e je finide dopo che al à vût dificoltât a cjatâ conferme ae vuide de aziende.
◆ Pal moment al somee che la colocazion dal so partît e vadi dal centri al centriçampe, intune direzion pro europeane e liberâl. «Si rindìn cont de responsabilitât che nus vês dade e le acetìn cun umiltât. Jo o soi convint che planc a planc o tacarìn a sodisfâ lis spietis, e che dopo doi mandâts o ’nt sodisfarìn plui di chês che o prometìn vuê», al à dit.
◆ Janez Janša, che al è stât fintremai cumò president dal consei dai ministris e leader dal Partît democratic sloven, subit dopo des elezions al à fat i compliments al vincidôr, il Moviment Libertât. Par Janša il Partît democratic sloven dopo chestis elezions al è plui fuart, parcè che al à vût plui mandâts che no chei che al veve fintremai cumò. Tai prossims agns, cuant che a saran buinis propuestis, il Partît lis sostignarà. ❚
Golob futur prin ministri
Luciano Lister
