La Sabide di sere Udin e je plui furlane cu la messe te glesie de Puritât

A son tancj, soredut int di une cierte etât, ma, un pôc a sorprese, no dome cristians cui cjavei blancs. A van ogni Sabide soresere, aes sîs dopomisdì, intal Oratori de Puritât a Udin par sintî la Peraule dal Signôr, par furlan. Une tradizion che e va indenant di agns cul jutori de Arcidiocesi e che e viôt ogni volte un predi diviers a tignî sù messe e une corâl diferente a cjantâ (chest an a son passadis 30). Ai 25 di Mai e je stade la ultime messe prime de fermade pai mês estîfs (si torne a scomençâ la prime Sabide di Otubar) e tante int no a volût pierdi l’apontament: anzians, cubiis maridadis cui fîs, cualchi zovin. A dî messe alì, a son passâts un grum di predis di dût il Friûl, di bonsignôr Rizieri De Tina (Nimis) fin pre Vezzio (Salt di Paulêt); di pre Adolfo Volpe, fin bonsignôr Giuseppe Baldàs, diretôr dal centri missionari de Diocesi di Gurize. La ultime celebrazion de stagjon e je tocjade a pre Davide Larice, un di chei predis combatîfs e ferbints, fondadôr de comunitât Micesio par judâ i zovins che a àn fastidis di droghe e alcul.
Al è singolâr sintî celebrâ messe par furlan: lis formulis dal rît uficiâl a sunin scletis, ven a dî “crevâ il pan” o ben sintî dî “la Madone un grumon sante”. Al sarà forsit parcè che no si è plui usâts a sintî fevelâ par furlan in situazions uficiâls, ma cuant che e rive la predicje, sintîle in lenghe furlane e je dute une altre robe: al somee di tornâ intun paîs, di jessî comunitât, che e cjate un pont di riferiment inte Glesie, “la Glesie che je di Rome, di Alessandrie e di Aquilee” al à dit il predi. “Il mont di vuê si ten sù su stupideçs e imbrois – al à tonât pre Larice tal sermon -, si jemple di marcjanzie e fufigneçs e al cîr di copâ la Domenie e cun jê la Santissime Trinitât. Ducj i cristians, no dome chei 150 mil che a àn firmât la petizion, a àn di impegnâsi in chest moment par liberâ il dì di fieste e dismenteâ, di Domenie, lis catedrâls dal marcjât. Se di no – al à continuât -, la Domenie invezit di jessi zornade di pâs, e devente zornade di publicitât: si torne a meti il vidiel di aur tal puest di Diu: bisugne puartâ vie la Domenie dal materialisim e des multinazionâls”.
Daspò recitât il Credo e il Pari
Nestri, la messe je lade indenant,
fin al finâl “Il Signor al sedi cun voaltris” “E ancje cun te” (ah, ce biele sensazion di famee, dai dal tu al plevan). Ma finît di cjapâ messe, la int no je lade vie: si è fermade culì, in chel lûc bielonon che al è l’Oratori de Puritât, insiorât cui frescs di Giambattista e Giandomenico Tiepolo, a scoltâ la corâl di Muçane, intant che oms e feminis che a passavin denant dal Oratori o par vie Sant Francesc, sintint cjantâ, a jentravin par viodi, plens di curiositât. Jenfri la int che e je stade a messe, forsit il plui zovin al jere un fantat di 29 agns, di Udin: “O ven spes a cjapâ messe par furlan – al à dit Stefano Filipponi –; cause, o merit, di mê mari e di gno pari che mi àn puartât cun lôr. Mi plâs sintî messe te mê lenghe, o ven plui vulintîr achì che no a chê par talian. Un pôc par conservâ la nestre tradizion, la nestre identitât e un pôc parcè che mi pâr che lis predicjis dai predis che a vegnin a dî messe achì a son plui bielis, plui vivarosis: peraulis risoludis che a fasin pensâ”.
Ancje Claudia, Lucia e Bruno a son di Udin, ma son un pôc mancul zovins di Stefano. Lôr a cjantavin te corâl dal Domo e propite cun chê corâl a son stâts a cjantâ ancje intal Oratori, dulà che cumò a tornin spes, par sintî messe par furlan. Se i domandais: “Ise simpri dute cheste int achì?” lôr a rispuindin che pal solit a nd è ancje di plui. “O vignìn achì – a àn dit –, parcè che al è l’unic puest dulà che a fasin la messe par furlan, une robe che e rapresente la nestre tiere. Cussì la funzion e à plui sintiment, nus ricuarde i nestris gjenitôrs”. ❚
✒ Alessia Pilotto