Grandis novitâts chest an pal Premi San Simon, che al cambie piel. Pe prime volte di 38 agns in ca, il premi plui prestigjôs de Regjon – che al pant la lenghe furlane tant che mieç di espression narative vivarose e dinamiche – nol acetarà romançs: chest parcè che il concors al à sielzût di deventâ bienâl e di lâ incuintri a une inovazion pardabon rivoluzionarie. Chest an si fâs indenant cun dôs sezions: di une bande la racuelte di contis cuntun minim di 100 mil batudis, di chê altre, novitât in assolût, il curtmetraç, incentrât su la interpretazion libare dal teme La crosere, che al cjape ispirazion dal toponim di Codroip di divignince latine Quadruvium, crosere di cuatri stradis.
I romançs a tornaran in sene l’an che al ven, di mût che i autôrs a varan doi agns di timp par scrivi lis lôr oparis. La convinzion de jurie cun a cjâf Carlo Tolazzi e je che la cualitât dai lavôrs e ledi a cressi. Tal 2018 il bant al sarà viert ancje ai fumuts, che l’an passât a àn screât la lôr presince al San Simon cu la vitorie di Il Costrutôr di trabicui di Giovanni di Qual di Tumieç. In cheste maniere il Premi, che al à vût tant che vincidôrs i plui impuartants inteletuâi di lenghe furlane, di Amedeo Giacomini, Pier Antonio Bellina, Gianni Gregoricchio, Franco Marchetta, par nomenâ dome cualchidun, si vierç ai lengaçs plui gnûfs cence dismenteâ la tradizion. E si slargje intune dimension internazionâl midiant de colaborazion cul Ente Friuli nel Mondo che al garantirà la difusion dal bant fra ducj i furlans presints in ogni lûc dal mont. ❚
✒ Walter Tomada
