La riviste «Gnovis pagjinis furlanis» in pericul

Tal numar di Març de riviste “Ladins dal Friûl” il diretôr Renzo Balzan, e dean de Union Scritôrs Furlans, al vise che par vie di un contribût no rivât «la storie de nestre riviste “Gnovis Pagjinis Furlanis” (il sfuei de Union, justeapont n.d.r.) e somee dabon rivade insom. Chest che al ven fûr in maniere sclagne al podarès sei juste apont l’ultin numar daspò trente agns di presince seguitive».
Pûr dant la nestre solidarietât a Renzo Balzan, i tegnìn ancje a marcâ ancje une altre robe: tal articul li che al da l’anunci, Balzan al fâs i conts dai bêçs distribuîts a chês altris sociis furlanis (dentri ancje La Patrie e la Filologjiche) par lamentâsi de injustizie. Po ben, chest mût di fâ rivendicazions no nus plâs: il probleme nol è la distribuzion dai fonts jenfri nô operadôrs, il probleme al è che o sin daûr a un tai gjenerâl de culture in marilenghe.
Plui util al sarès stât fâ il confront cui beçonons dâts a altris realtâts culturâls in Regjon, come par esempli al à fat il blog dal Comitât pe Autonomie e pal Rilanç dal Friûl, che tal dâ la notizie al à ricuardât i 17 milions di euros (14 milions di debit taponât de regjon + 3 milions dome pal 2013) dâts al teatri Verdi di Triest. E i esemplis a saressin tancj e tancj.
Fin tant che no fasarìn un pas indenant tal savê fâ lis rivendicazions, no cressarìn mai. Cuant che a Fevrâr 2013 o vin vût il tai dal 40% dai contribûts par un lavôr che o fasìn par dut l’an (e no dome par un numar unic), no sin lâts a viodi ce che a àn vût chei altris, o vin pontât il dêt cuintri il tai in se. Nô no i stin a fâ la figure dai gjai spadâts dal Manzoni, e no dome parcè che e je la citazion di un libri talianon… ❚
✒ Redazion