Pocjis dirigjentis tal setôr privât,
plui contrats part time e paiis plui bassis dai oms.
A coventin gnovis oportunitâts di conciliazion di famee e lavôr
Parcè il Friûl no isal plui une locomotive di disvilup di un contest talian dulà che la cressite e je a zero? In ce maniere si puedial distrigâ il grop di une crisi che nus involuce intun glimuç penç di problemis, de disocupazion ae precarizazion, de decualificazion de lavoranzie ae gnove emigrazion?
La rispueste e pues vignî dome de inovazion. Daûr dal Regional Innovation Scoreboard 2017, che l’economist Roberto Grandinetti al dopre simpri tant che l’indiç di riferiment plui atendibil a nivel european, il Friûl-Vignesie Julie al à une vore di aziendis che a pensin di bessolis a rinovâ metodis e produzions. Se il Baden-Wurttemberg, il Land plui inovatîf de Gjermanie, al è considerât a base 100, il Friûl al rivarès a 82: l’indicadôr al rive a 87 su la regjistrazion di dissens e brevets, che e je cuasi a nivel todesc, ma o vin un biel risultât (63, parsore de medie taliane) ancje sul valôr de esportazion di bens di nivel tecnologjic alt, che a ocupin il 54% dai lavoradôrs dal Baden-Wurttenberg. La situazion dut câs e je pardabon paradossâl, parcè che se o lin a analizâ l’invistiment in tiermins di ricercje sul Pil fat dal setôr public, o rivìn al 55, e sul setôr privât, il valôr al rive a 34: un tierç che in Gjermanie.
Ce vuelino dî chescj dâts? Che par rindi plui facil il trasferiment de tecnologjie dai centris di ricercje universitaris o dai parcs tecnologjics aes impresis al coventarès un jutori in tiermins di mancul tassis e burocrazie, plui incentîfs e soredut un salt di mentalitât, metint dongje dutis lis energjiis par doprâ in maniere massive risorsis e metodis che a smicjin bande l’avignî. La inovazion no à di jessi une peraule vueide, se no la fuarce dinamiche de economie si pierdarà intun nûl di ocasions pierdudis, e i cerviei nostrans a saran simpri plui seneôs di lâ inaltrò, dulà che lis lôr ideis a varan plui pussibilitât di mudâsi in realtât.
I dâts sul lavôr in chest moment a son particolarmentri dificii di aprofondî. Nus disin che la percentuâl di ocupâts e je tornade chê dal 2008, la cuantitât di chei che a lavorin si è sbassade di 20 mil: e chest ancje se la popolazion no je diminuide. Par sigûr, al è di sperâ che il gnûf redit di citadinance al coventi almancul par fâ plui eficients i centris pal lavôr che cumò a son stimâts dai disocupâts mancul utii dai centris di colocament interinâl. Tal 2017, l’ultin scrutini che ju à rivuardâts al fevele di un 27% de utence che si declare contente dal lôr servizi: e la sodisfazion si sbasse a un 5% che al fâs impression se si va a considerâ la comprensibilitât dal lengaç che al ven doprât cun chei che a cirin un puest di lavôr. In chel an, tai centris pal lavôr de Regjon a son rivâts 67 mil 391 utents, une vore di plui dai disocupâts uficiâi che in chê volte a rivavin al 6,6%. Intun sisteme che al funzione, a varessin di rivâ a ricolocâsi in curt: ma nol è propit cussì, parcè che se si cjale il numar di rapuarts di lavôr, a son simpri di plui chei che a van incuintri a plui trasformazions ancje tal cors dal stes an.
Se ju dividìn par fasse di etât, lis cuantitâts a son in pratiche compagnis: 23 mil 479 fin a 29 agns, 21 mil 651 parsore dai 45 e 22 mil 261 inte fasse di mieç. Di chescj, a son plui di 10 mil chei che a son stâts candidâts ae assunzion intune aziende che e veve manifestât bisugne di lavoranzie e il 49% al à cjatât lavôr. Dificil savê trops che a son invezit chei che a son passâts di un lavôr a di chel altri o che a àn dome vude une trasformazion di contrat. Chel che al è clâr al è che zovins, feminis e personis sore i 55 agns a son simpri lis categoriis che a fasin plui fature a cjatâ lavôr e a mantignîlu, e se lu cjatin si scuintrin dispès cun formis di lavôr sotpaiât o cuntune domande di oris che no permet di vê nissune indipendence economiche.
Al è clâr che la casse integrazion doprade tai agns de crisi e à cambiât la struture profonde dal lavôr in regjon, e ancje in cheste suaze al à di jessi interpretât forsit il “bum” des partidis Ivz che al sta lant indenant di doi agns. Tal 2018, in Friûl-Vignesie Julie a son stadis viertis plui di 8 mil 200 gnovis partidis Ivz, 180 plui dal an prin (+2,2%), intant che a nivel talian il numar si è sbassât dal 0,5%. In regjon, lis provinciis di Udin (+3,5%) e di Triest (+2,8%) a àn segnât l’aument plui grant. La plui part des gnovis partidis Ivz (43%) e je sot dai 35 agns parcè che cheste forme di lavôr e ven doprade simpri di plui tant che une modalitât pai zovins par jentrâ o par restâ sul marcjât dal lavôr, in alternative a chês altris formis contratuâls. Une su sîs di chestis gnovis partidis Ivz e je vierte di citadins forescj.
Al è interessant considerâ che intai ultins agns il numar plui penç di gnovis ativazions al è stât intal setôr dal cumierç, ma tal 2018 al è stât invezit chel des ativitâts professionâls sientifichis e tecnichis (il 17% dal totâl dal ultin an) a mostrâ il plui grant disvilup. Chest compart al cjape dentri sedi lis libaris professions (nodârs, avocâts, comercialiscj, inzegnîrs, architets), sedi lis ativitâts no regoladis di ordins professionâi (relazions publichis e comunicazion, consulencis, publicitât, imobiliariscj). La platee si slargjarà ancjemò cu lis gnovis oportunitâts regaladis dal regjim forfetari, che al permet di vê une oportunitât di plui par cui che al à miôr lavorâ in autonomie invezit che jessi dipendent. Cuissà se chest cuadri al puartarà a miorâ il gender gap che ancjemò al esist in riferiment a cualitât e cuantitât de ocupazion feminine. Ancje se intal prin toc de crisi lis feminis a tignivin dûr, e no regjistravin nivei ocupazionâi piês di chei dai oms, cumò il diferenziâl al à tornât a slargjâsi. Il tas percentuâl des lavoradoris al è dal 55%, e nol è mai miorât tai ultins agns.
Si partìs adore: in percentuâl i “Neet” (i zovins che no lavorin e no studiin) a son il 19,8% des fantatis e il 14,6% dai fantats. Lis feminis sot dai 29 agns che a lavorin a son passadis in 8 agns dal 48,5% al 35,5%, intant che invezit lis lavoradoris che a àn dai 55 ai 64 agns a son passadis dal 21,5% al 36,5%. La “cuote 100” e varès di judâ a corezi cheste situazion, ma cuâl lavôr ur spietaraial a chestis feminis, plui o mancul zovinis che a sedin, cuant che lu cjataran? Doi dâts a judin a capî in ce senari che si cjatìn: dome il 12% dai dirigjents e il 24% dai cuadris dal setôr privât a son feminis. Dai ultins dâts, il 36% des feminis al à contrats part time, cuintri dome il 5% dai oms. Chest al è ancje consecuence dal fat che lis feminis laureadis in materiis sientifichis a son la metât dai oms, e chest al siere un potenziâl troi di ingrès preferenziâl tal marcjât dal lavôr. E ancje se il 75% des feminis che si laurein a cjatin lavôr, al reste alt il tas di disocupazion. E sul panorame globâl dal nestri marcjât dal lavôr al è alt ancje il pay gap cui oms che a cjapin il 17,9% plui des feminis: il 20,8% se a son dirigjents e il 23,7% se a son impleâts. Il divari al cres cu la etât e no si ridûs, cun consecuencis ancje su lis pensions des feminis, che a son une vore plui lizeris.
Stant cussì lis robis, al è clâr che la ricostruzion economiche de Patrie no podarà che partî des feminis, de capacitât di dâur gnovis oportunitâts di conciliazion di famee e lavôr, di cirî soluzions gnovis par fâlis lavorâ in maniere plui conveniente par lôr e par dut il sisteme. Ancje cheste e je inovazion: e di jê, no si podarà fâ di mancul. Parcè che lis feminis, dopo vê tignût in pîts trê cjantons des cjasis dal Friûl, cumò a varan ancje di tignî sù la sô economie. ❚
Walter Tomada
